E barku di Marina Hulandes Zr.Ms. Holland, durante dianan 10 i 13 di Mart último, a interseptá kuater transporte di droga den Laman Karibe, i ku esaki a konfiská un kantidat di mas ku 2,2 tòn di kokaina.
E asina yamá botonan ‘go-fast’ a keda deskubrí pa e avion marítimo di patruya di Wardakosta Region Karibe Hulandes. Despues di e notifikashon tokante e botonan rápido ‘go-fast’, Zr.Ms. Holland a manda e helikòpter embarká riba e Wardakosta Merikano, huntu ku dos boto rápido di intersepshon den nan direkshon. Dos di e kuater ‘go-fast’ nan a entregá nan mes direktamente. E otro dos nan a hasi esei numa despues ku a lòs algun tiru di atvertensha.
E total di dies sospechoso huntu ku e kontrabanda, a keda transferí pa Wardakosta Merikano. E kontrabandistanan sospechoso lo keda pèrsigui na Estado Unídos di Merka i e kontrabanda ya a keda destruí.
Zr.Ms. Holland for di Òktober 2022 ta aktivo den e region komo Barku Patruyero pa Region Karibe Hulandes, i ta traha alternativamente huntu ku Wardakosta Region Karibe Hulandes i Wardakosta Merikano. Entretantu tin 13.000 kilo di droga interseptá riba e lista di kapturashon di Zr. Ms. Holland.
