Zr.Ms. Groningen i Wardakosta ta interseptá kantidat grandi di droga den laman Karibe

E Barku di Marina Hulandes Zr.Ms. Groningen den kombinashon ku Wardakosta Karibe
Hulandes, riba djadumingu mainta trempan 16 di yüli 2023, a stroba un transporte di droga durante kua un gran kantidat di narkótika a keda interseptá.

E Barku Zr.Ms. Groningen a risibí un notifikashon di Wardakosta, tokante un boto sospechoso den laman Karibe. Ku asistensia di e avion Dash-8 di Wardakosta, Groningen a drenta akshon mes ora, i durante henter anochi a sigui e go-fast.

Durante e persekushon ku dos boto di intersepshon, tipo FRISC, di Groningen, e go-fast a kambia di rumbo pa asina purba di hui. E kontrabandistanan a tira barí di kombustibel i tambe paketenan di droga den laman, ya asina nan por a gana velosidat. Despues di un persekushon largu e go-fast a logra skapa.

Durante e akshon di búskeda ku a sigui, mas ku 50 pakete ku alrededor di 1600 kilo kokaina, a keda saká for di laman. E kontrabanda a keda konfiská i entregá na Kuerpo Polisial Kòrsou, na unda finalmente esaki a keda destruí.