Mariano ‘Pitòsh’ Heyden a keda promové resientemente komo Profesor na Universidat di Monash na Melbourne, Oustralia. Profesor Dr. Heyden tabata Profesor Asosiá na Departamentu di Maneho i Fakultat Empresarial i di Ekonomia na Universidat di Monash durante di último 6 aña despues di a kuminsá su karera na Universidat di Newcastle na Oustralia.
A rekonos’é ku e promoshon aki pa su kontribushon na Universidat di Monash den áreanan di aktividatnan akadémiko: investigashon, edukashon i enbolbimentu.
E ta tambe for di 1 di yanüari 2022, direktor HDR, e delegado ku outoridat pa mayoria asuntu i pa guia di kandidatonan ku ambishon pa nan Ph.D. E ta konosí bou di koleganan internashonal pa vários investigashon, publikashon i presentashon.
Profesor Dr. Heyden a nase na Kòrsou i a bai Cayena Kleuterschool, Berg Carmel College, Radulphus College i Universidat di Kòrsou. El a haña su Master den Filosofia na Erasmus Research Institute for Management na Rotterdam, Ulanda, kaminda el a haña tambe su título di Doktor.
Ora ku a puntr’é kon el a yega asina leu, el a kontestá ku ora a mand’é lesa un buki, el a les’é e buki dos biaha. E no ta mira su resultado komo produkto di un lucha pero komo resultado di no pèrdè bo meta for di bista i pa lesa mas tantu posibel pa sa mas tantu posibel.
Su mayornan Mariano i Reyna Heyden-Joe i famia ta selebrando su logro ku gratitut i ta yama danki na kada persona ku di un forma òf otro a kontribuí na su desaroyo personal i profeshonal.
