Despues di detencion di e yiu homber di líder di partido Pueblo Prome (Michael Williams), awe ta yiu di líder di partido MEP y Prome Minister (Evelyn Croes) ta deteni na warda di polis na Shaba. Tur esaki tin di haber cu un acto di violencia cu a tuma luga den luna di november na Gusto y e restaurant Azia.
E sospechosonan den e caso aki ta Nigel Williams, Christopher Williams, un amigo di nan, Kevin Wever, kende recientemente a casa, y e casa di su ruman muhe.
Awe mainta, vocero di Ministerio Publico Ann Angela a bisa prensa lo siguiente: “Mi ta confirma cu e investigacion relaciona cu e incidente di violencia na restaurante Asia, caminda un trahado a resulta herida, ta sigui. Den cuadro di e investigacion un sospechoso a keda deteni awe mainta. Relaciona cu e derecho riba privacidad no ta informa tocante e identidad di e sospechoso.”
E tabata un problema entre aparentemente tiramento di palabra entre e dos hombernan aki cu a cuminsa na Gusto y a sigui na Azia Restaurant. E situacion a bay asina leu, segun e informe suministra cu tabatin insulto y tiramento di botter cu a laga empleado di e restaurant herida. E ultimo aki a entrega keho. Pues e keho no ta ni di Nigel Williams ni di Kevin Wever contra di otro.
Mescos cu a detene Williams den luna di december, e procedura ta exigi cu mester a detene Kevin tambe. Pero awe mainta e mes, den compania di su Abogado, a yega warda di Shaba pa entrega su mes.
Ta trata aki di un caso comun y coriente, cu si no tabata pa e vinculo politico di e dos sospechosonan aki, e caso lo no a haya atencion. Por a compronde cu tin un ordo di detencion Christopher Williams cu ta casa di parlamentario Gerlien Croes.
Tipo di casonan asina normalmente ta wordo cera den un luna di tempo. Sea ta trata di yega na un aregla via di un TOM Zitting of e caso ta bay dilanti mesa berde. Den casonan asina, como cu ta trata di un simpel maltrato, por haya sa un castigo condicional, of trabou pa comunidad.
Ken tin razon den e caso aki, niun hende por bisa pasobra ainda ta den e proceso di interogacion y e procesverbaal no ta cla ainda. Recherchenan no solamente mester interoga e sospechosonan, pero tambe testigonan y mira tur material filmografico cu nan por haya na ambos establecimento.
Mientras cu ta en espera di esaki, e interogacion y investacion ta sigui.