INDEBON ta hasi un yamada riba pueblo pa bin apoyá nos atletanan boneriano hóben masalmente e siman akí na e weganan interinsular. E weganan ta tuma lugá for di 14 te 17 di mart 2024 na Boneiru. Durante e siman akí nos atletanan lokal ta kompetí den futbòl, basketbòl i aquathlon kontra deportistanan hòben di skol básiko i enseñansa avansá di Aruba i Kòrsou. Riba página di Facebook di INDEBON tin tur informashon tokante e kompetensianan.
E promé kompetensianan di e weganan interinsular a tuma lugá na Aruba den e periodo di 29 di febrüari te 3 di mart. Timnan for di Aruba, Boneiru i Kòrsou a partisipá na kompetensia di dam, ahedres i trèfbal. Terrence de Jongh, hefe di INDEBON ta wak bèk ku satisfakshon riba partisipashon i prestashon di e atletanan boneriano hóben na Aruba. ‘Nan a duna tur loke nan tabata por, nan a gosa i nan a siña masha hopi mes. Mi ta anhelá e kompetensianan di e siman akí i mi ta spera ku hopi hende ta bin apoyá nos talentonan’, segun de Jongh.
Na Aruba Minelly Wu tabata ganadó den ahedres den kategoria di mucha muhé 2013/2014. Amaris Djojopawiro a finalisá na di tres lugá den kategoria di 2011/2012. Serka e mucha hòmbernan Daniel Fernandez Ojeda a finalisá na di tres lugá den kategoria di 2013/2014. Boneiru a finalisá na di tres luga den ahedres.
Den e deporte di dam Boneiru tabata bon representá den kategoria di mucha muhé 2011/2012. Camila Gonzalez a finalisá na di dos lugá i Joemi Herrera Delgado na di tres lugá den e kategoria akí. E mucha hòmbernan a sa di posishoná nan mes bon den kategoria di 2011/2012. E di dos lugá den e kategoria akí a bai pa Xi-Qion Frans, miéntras Xinglong Feng a finalisá na di tres lugá. Boneiru a terminá na di dos lugá.
Den e deporte di trèfbal Kolegio Kristu Bon Wardador a konkistá e título di tim mas disipliná. Ku un energia i disiplina nunka bisto e altletanan di Kolegio Kristu Bon Wardador a partisipá na e kompetensianan. Den final pa di tres òf di kuater lugá, Boneiru a finalisá na di kuater lugá.
