Gobièrnu di Boneiru a hasi un yamada na e komishon di Tweede Kamer pa Relashon ku Reino pa probechá di un debate ku pronto ta bai tene pa konvensé e minister pa Maneho di Pobresa pa hasi akohida pa mucha na Hulanda Karibense kompletamente grátis.
Gabinete ke pa mayornan na islanan BES meskos ku na Hulanda Europeo paga un kontribushon propio di 4 porshenbto. Den un karta na e komishon di Tweede Kamer, Kolegio Ehekutivo ta mustra ku e entradanan pa Reino di e kontribushon propio ta kasi igual ku e gastunan di ehekushon èkstra pa kobra e kontribushon. E minister ta konsiderá pa pèrmití e entidatnan públiko pa kompensá mayornan ku un entrada abou, pero esei ta nifiká ku ta pone un peso èkstra pa e entidatnan públiko tantu finansieramente komo atministrativamente.
“Ta hasi kos innesesariamente kompliká, miéntras e punto di salida di 10-10-’10 tabata pa tene legislashon i regulashon mas simpel posibel. Konstitushon ta hasi posibel pa desviá di leinan nashonal ora ta trata di sirkunstansianan spesial. Teniendo kuenta ku e pobresa amplio na e islanan kombiná ku e mínimo sosial ku ainda falta pa bini, tin tur motibu pa hasi un eksepshon”, segun diputado di Asuntu Sosial i Bienestar Elvis Tjin Asjoe.
Inhustisia sosial
Ku Kolegio Ehekutivo ta dirigí su mes awor den un karta spesífikamente riba akohida pa mucha, no ta nifiká ku e ta aseptá e inhustisia sosial grandi ku a surgi i ta mantené, pa motibu ku gabinete ta keda posponé introdukshon di un mínimo di eksistensia ku por biba di dje. Diputado Tjin Asjoe: “Nos tin idea kon aselerá e proseso ei, pero esei bo no ta regla den e debate ku ta bini kaminda miembronan tin solamente dos minüt pa papia. P’esei pa e okashon akí, nos ta konsentrá spesífikamente riba akohida pa mucha grátis, pasobra por ehekutá esei rápidamente i fásilmente i no tin konsekuensia finansiero pa Reino.”
