Dia 9 di februari 2023, Movimiento Electoral di Pueblo MEP ta cumpli 52 aña y mi ta masha orguyoso di tin e honor di por ta forma parti di un movimiento politico cu a haci asina hopi na bienestar di Aruba.
Partido MEP lidera pa nos Lider inmortal Betico Croes a logra Status Aparte pa Aruba den Reino Hulandes. Bou liderazgo di nos Lider Honorario Nel Oduber, Aruba a desaroya grandemente. Awor den e man capabel di nos Lider Evelyn Wever-Croes, MEP ta trahando incansablemente pa Aruba por logra su maximo potencial y bienestar.
E ta un honor grandi pa mi, pa por ta para den e fila di MEP y traha pa Aruba por conserva su libertad pa progresa. E ta exigi inmenso corahe y valor, y pesey mi ta pidi nos bon Dios pa sigui brinda nos su forza, su sabiduria y su pasenshi pa por sigui traha den e vehiculo MEP na bienestar di Aruba.
Masha masha pabien na nos Lider Evelyn, nos Lider Honorario Nel, na tur candidato, na directivanan, na comisionnan, na lidernan di bario y specialmente na tur cu a y ta sostene Movimiento Electoral di Pueblo, muy especial e ultimo 52 añan. Pabien MEP y Aruba.