Un situacion cu ta andando for di aña 2015 bou directiva di SKOA ta parce cu awo kier bay tira riba lomba di mayornan y ta persisti pa gobierno tuma over e pagonan. Fout cometi door di e directivanan di SKOA mester wordo carga door di nan y no door di gobierno y mayor di studiantenan.
Informacion cu a ricibi awe ta indica cu SKOA lo a tuma e decision pa aumenta schoolgeld na e suma di 750 florin pa aña. Un suma astronomico cu den situacion normal mes ta hopi y awe den un situacion di crisis a causa di pandemia di COVID-19, cu ta haci e situacion di finanza familiar pio.
Tur esaki a causa di e problema cu a surgi algun aña atras cu pago di salario di werksternan. Gobierno a haci un cambio ora cu a bin constata cu SKOA incorectamente tabata hinca gastonan di e grupo di trahado aki den e post di subsidio di salario, mientras cu nan no ta ambtenaar ni gelijkgestelden. E tipo di gasto aki, Gobierno a informa SKOA cu mester cay bou gasto di operacion. E ta e parti di mantencion di e scolnan limpi.
Pa colmo despues di e carta cu Gobierno a manda, SKOA a dicidi toch pa sigui cu e maneho malo cu nan a bin ta haciendo riba e terreno aki. A pidi subsidio di salario pa werksternan mientras cu Gobierno a pone e suma aki caba den gastonan di operacion.
Pa awe bin tende cu e unico solucion cu SKOA tin, pa no desvia di su mal maneho ta informa cabesante di scolnan cu e schoolgeld ta bay bira 750 florin pa aña. E mal maneho aki ta wordo ehecuta solamente door di directiva di SKOA, unda ta pone weksternan den un posicion igual cu ambtenaar y gelijkgestelden, cu tur e compensacionnan adicional cu Gobierno ta duna, manera vakantieuitkering.
A cambia director pero e maneho aki a keda mescos, y e medida nobo di e fundacion aki ta bay perhudica studiantenan enormemente. Simplemente pa un capricho di e directiva cu no kier admiti e eror cu nan a cometen poniendo e pago di werksternan bou di subsidio di salario enbes di gasto di operacion.
Tin un carta cu ta data for di 1997 / 1998 unda cu Gobierno a informa SKOA caba cu e werksternan no ta gelijkgesteld na ambtenaarnan. Pues nan no tin e mesun posicion huridico cu Ambtenaarnan. Na 2011 a pone un tiki mas cu 1 miyon florin pa gastonan di explotacion (maneho) bou cual ta cay gastonan di mantencion di e scolnan.
Hues a bisa bon cla den un di su sentencianan, den caso cu SKOA a cuminsa y a perde, cu mantencion di e edificionan limpi ta cay bou di exploitatiekosten. Cu nan mes a tuma werkster den servicio no ta nifica, segun Corte, cu nan mester cay bou di e ley di “overige personeel”. Werksternan tin un decreto di nombracion.Huesnan den dos caso a bisa bon cla cu e peticion di SKOA no tin base den un bodemprocedure. Awor cu nan ta haya nan mes cu gastonan adicional causa pa nan mesun mal maneho, kier tira esaki riba lomba di gobierno y mayornan unda cu e posibilidad grandi ta cu hopi mayor no lo por page y e mucha ta keda perhudica abase di un mal maneho cu SKOA ta bin ta haciendo for di basta anja. Ta bisto cu e interes general di e muchanan di full Aruba no ta na prome luga pero pa e 10 werksternan cu ta bringa alma y cuerpo den desicionnan robes cu SKOA mes a tuma.
Mas abao por mira dos vonnis di hues cu tampoco SKOA ta respeta
