Minister Ruisandro Cijntje di Ministerio pa Desaroyo Economico ta contento cu e noticia alentador cu Oficina di Turismo di Corsou (CTB) a publica recientemente relaciona cu e skema di winter di WestJet pa e periodo di 2023/2024.
Esaki ta nifica un aumento den cantidad di vuelo directo semanal pa Corsou, loke ta ofrece oportunidad di crecemento pa nos economia i mas bida pa nos sector di turismo.
Conforme CTB, entrante 18 di december 2023 te cu 1 di april 2024 e vuelonan entre Toronto y Corsou lo aumenta na 2 biaha pa siman riba diadomingo i dialuna. E vuelo pa Corsou lo keda efectua cu un Boeing 737 MAX cu un capacidad di 174 stoel. Minister ta mira e desaroyo aki cu un bista positivo, pasobra e ta bini como resultado di e demanda halto di Canada pa Corsou. Esaki ta un resultado positivo pa nos pais, mirando e cifranan cu CTB a publica ultimamente di desaroyo di turismo, caminda Canada a resulta den e top 5 di paisnan cu a bishita Corsou na luna di augustus. Ademas, Minister ta contento cu nos comunidad tambe lo tin mas opcion di biahe pa bishita Toronto. Loke por nifica tambe mas conexion i colaboracion entre Corsou i Canada.
Minister Cijntje ta aplaudi e colaboracion estrecho entre WestJet i partnernan local: Oficina di Turismo di Corsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA), cu ta haciendo esfuersonan incansabel pa Corsou ta mas accesibel pa turistanan for di Canada. Segun Minister, nos mester sigui haci mas di e esfuersonan aki pa crea i reforsa mas aliansa cu partnernan strategico pa amplia e posibilidad nan pa mas biahero bishita nos pais. E esfuersonan aki i promocion strategico continuo pa atrae mas turista ta sigui yuda nos riba e caminda di crecemento di e sector di turismo, un di e pilarnan principal cu ta carga nos economia.