Wardakosta Karibe Hulandes resientemente a risibí un notifikashon ku e tankero CETUS tabatin
problema riba laman, i ku e tripulashon mester a bandoná e barku inmediatamente. Sentro di
Reskate i Kordinashon mesora a dirigí e avion di patruyahe di Wardakosta pa e ubikashon
spesifiká, pa kontrolá kiko a sosedé. Una bes ku a yega na e lokalidat, mas o ménos 160 mia
nortwèst di Kòrsou, e tripulashon di e avion Dash a mira ku e personanan den laman tabata drif
riba e asina yama ‘fenders’ di e barku pasobra nan tankero ku e nòmber CETUS a senk. Despues
di esaki e avion Dash a tira dos boto salbabida for di e avion pa e 14 personanan den laman i un
kachó. E personanan a subi i sinta lihé den e botonan salbabida, en espera di yudansa ku tabata
na kaminda. Pa por a tene e dos botonan di salbabida na bista, kualnan tabata drif riba laman
separá for di otro i salbaguardiá e siguridat di e personanan, RCC a dirigí un di dos avion
patruyero di Wardakosta na e lokalidat pa tambe duna asistensha riba laman. E helikòpter di e
cutter di Wardakosta Merikano (USCG), ku e nòmber THETIS, tambe a yuda buska e personanan
riba laman durante e akshon di reskate aki.
RCC entretantu a manda un petishon via NAVTEX pa e tankeronan MELBA i STAVANGER, pa
asistensha den e kaso aki. E dos tankeronan ku a bai di akuerdo pa ofresé yudansa, a nabegá
inmediatamente bai na e personanan pa salba esakinan. Una bes ku nan a yega na e lokalidat e
tankeronan MELBA i STAVANGER a tuma e personanan di e dos botonan di salbabida na bordo.
Den akuerdo ku RCC i e kapitannan di e dos tankeronan, e personanan i e kachó a nabegá a
bordo di e tankeronan di kual un a bai Venezuela i e otro Trinidad i Tobago, pa despues bai nan
kas bek sano i salvo. Riba e tankero CETUS ku a senk, tabatin dos miembro di tripulashon ku te
awe a keda pèrdí. Wardakosta ta deseá famia di esnan pèrdí forsa.
