Ultimo tempu Wardakosta ku asistensha di Defensa den Karibe a bin ta intensivá patruyanan na
kosta ku regularidat. E intensifikashon di e patruyanan den e periodo di krisis di corona ta
prinsipalmente pa kontrolá e tráfikashon ilegal di merkansia i personanan ku ta hasi intento pa
yega e islanan ku rísiko ku personanan por ta infektá ku e vírùs di COVID-19. Esunnan ku ta
infektá ta forma un peliger pa nos salubridat públiko di nos isla. Resientemente Wardakosta a
dentené un lancha ku 26 indokumentado na bordo. Despues ku a hasi tèst di COVID-19 a
resultá ku 9 di e personanan tabata infektá ku e vírùs. Wardakosta ta alertá piskadónan ku ta
bai laman pa hasi trasbordo di piska ku botonan venesolano tambe, pa tene kuenta ku nan ta
tuma un rísiko na momento di kontakto humano durante di e trasbordo di kargamentu.
Wardakosta lo keda patruyá kosta i laman ku e kolaborashon di Defensa den Karibe pa e
periodo binidero pa sigui protehá i vigilá nos kostanan.
Wardakosta ta hasi un súplika na habitantenan pa na momento ku mira algu sospechoso òf
peligroso riba laman òf na kosta, pa yama Wardakosta riba e number 913.
E number akí ta alkansabel di dia i anochi. Barkunan riba laman tambe por tuma kontakto ku e
Sentro di Reskate di Wardakosta via di e kanal VHF 16 na momentu ku nan mira algu
sospechoso òf peligroso riba laman. Kubo kolaborashon nos por mantené e kostanan i laman
seif durante di e krisis di corona tambe.
Wardakosta ta keda patruyá nos kostanan di dia i anochi
