Despues di ta den servisio di Wardakosta pa 12,5 aña, di kual e último sinku añanan el
a traha komo Hefe di Punto di Sosten di Wardakosta na Hato na Kòrsou, Bas van
Heeringen ta bandoná WardaKosta. Entretantu ayera, Stefan Roll ta e Hefe di e Punto
di Sosten nobo. Stefan ta un konosí di WardaKosta, den pasado e tabata okupá e
funshon di Hefe di Servisio Operashonal di Hato i tambe e puesto di Hefe di e Sentro di
Operashon Marítimo na Wardakosta. Pues Stefan konosé e organisashon di paden i
pafó i por kuminsá mesora ku su trabounan di operashon na Hato. Den e próksimo
añanan Stefan lo eksperensha un periodo importante na Wardakosta, den kual lo tin
hopi mas énfasis riba e trabounan di Inteligensia Polisial (Intelligence Gestuurde
Politieoptreden). Esaki ta nifiká ku Wardakosta lo kondusí su operashonnan mas i mas
a base di analisisnan.
Ultimo añanan Bas van Heeringen tabata envolví den entre otro seramentu di
kontraktnan nobo pa e unidadnan aéreo di Wardakosta, ku un termino di dies aña. E
ekiponan nobo akí ta hopi apto pa operashonnan di reskate riba laman, tareanan di
investigashon i vigilansha.
Durante di e seremonia di transferensha di mando den presensia di Direktor di
Wardakosta di Karibe, Walter Hansen i Direktor Suplente di Wardakosta, Joelle de Jong
– Mercelina, Bas a wak bèk riba su 12,5 aña di servisio na Wardakosta i e hopi
operashonnan di reskate, e tantisimo hende ku a ser reskatá i e ròl importante di e
Punto di Sosten di Hato den operashonnan kontra droga. E la gradisí tur hende i
speshalmente su koleganan na e Punto di Sosten na Hato. Wardakosta ta yama Stefan
Roll bon biní i ta dese’é tur kos bon den su funshon nobo den seno di Wardakosta di
Karibe.
Riba e potret dilanti di e avion di Wardakosta: banda links Bas van Heeringen i rèks Stefan Roll.
