Pa loke ta trata e campaña di vacunacion nacional contra COVID -19 no a caba ainda. Vocero di DVG Jurette Croes cutambe ta forma parti den e crisis team ta duna di conoce cu te cu ayera e update tabata cu Aruba tin un total di 57517 persona cu a caba a vacuna, di e total aki e ta un 58 % di e grupo di meta cu ta hobenan di 18 aña bay ariba.
Segun Vocero di DVG Aruba ta canando riba e bon caminda pero e deseo semper ta keda pa mas hende bay vacuna y e minimo cu DVG kier yega ta 75 % di e comunidad di Aruba pa ta vacuna. Mester bisa si pa yega aki ainda tin trabaonan cu mester tuma luga unda cu hopi persona cu tin cu yega pa por haya nan vacuna.
Na inicio e grupo di mas vunerabel cu tabata focus hopi riba dje ta esunnan di 60 aña bay ariba pa nan acudi masivamente y e resultado di esaki ta cu a vacuna 67% di 60 aña bay ariba, cu ta un resultado hopi bon.
Sinembargo loke cu ta hala hopi atencion ta e grupo di persona cu ta di 18 aña bay ariba cu ta esunnan cu a acudi menos , principalmente esunnan entre 18 pa 40 aña. Pa es motibo aki mes DVG ta sigui conscientisa pa e grupo aki bay vacuna.
Berdad na inicio a bisa e hobennan cu nan no ta e grupo di risico , nan ta saludabel y cu nan por bringa e COVID hopi bon , pero loke cu DVG no a conta cu ne ta e variantenan cu tambe a presenta despues y esaki ta haciendo na e momentonan aki cu esunnan mas hoben ta esunnan cu ta keda afecta debi cu esunnan mas grandi a vacuna y nan ta protegi y e virus ta keda core rond di esunnan mas hoben.
Loke cu mester tene cuenta cu ne tambe ta cu e virus ta adapta su mes y por mira na e cifranan di edad cu esnan ta keda contagia y cu ta desaroya complicacionnan ta esunnan cu ta mas hoben. Vocero di DVG ta haci un yamada pa esnan di 18 aña pa 40 aña cu no a vacuna ainda pa haci esaki mas pronto cu ta posibel.
Sinembargo no ta na Aruba so e grupo di 18 pa 40 aña no ta vacunando pero na islanan den caribe tambe tin e problema aki , rond mundo e grupo aki no ta poniendo atencion pa bay vacuna. Tin diferente factornan cu ta hunga den nan pensamento unda cu nan ta duna di conoce cu nan ta hoben y nan ta saludabel y si haya COVID mes no lo afecta nan. Tambe tin ta pensa cu esaki no ta un vacuna y tambe tin un grupo pa motibo di labor ainda nan no por yega.
Tin diferente factornan y DVG na e momentonan aki ta deliberando riba tur e factornan aki cu ta interumpi e grupo aki cu no ta yega pa vacuna. Actualmente DVG ta haci bishita na diferente hotelnan pa duna charla pa asina e informacion yega pa vacuna.
Por acudi na un di e prik postnan sea ta na centro libertador betico croes na st Cruz for di dialuna pa diabierna for di 8 :30 te cu 7or di anochi nonstop. Esnan cu ta caba di traha den oranan di atardi por pasa ainda prome cu 7 or di anochi.