Ta temporada di vakantie y hopi di nos ta lubida pa sigura nos mes prome cu biaha. Algemene Ziektekosten Verzekering (AZV) ta kere cu ta hopi importante pa tur hende ta consciente cu AZV ta keda cubri solamente na Aruba y no den exterior.
Vocero di AZV Solange Tchong ta duna di conoce cu e miho recomendacion ta pa tur hende cu kier bay biaha pa nan cumpra un seguro di biahe. E ley di AZV a keda introduci pa e cuido medico na Aruba so y no den exterior. Esaki ta importante pa tur asegurado realisa su mes cu na momento cu ta bay biaha, principalmente den e periodo aki cu diferente mayornan ta cumpra nan ticketnan pa bay biaha unda cu ta bay bishita diferente otro pais pa vakantie of pa bay bishita famia den exterior, e ta sumamente importante pa por cumpra un seguro di biahe cerca cualkier compania di seguro di e persona su mes un gusto.
Un seguro di biahe ta cubri e gastonan di cuido medico di emergencia, esey kiermen si algo mester pasa porehempel net ta bahando di un taxi y ta trompica cay y a kibra pia, e gastonan di e tratamento pa trata e pia ta keda cubri door di e seguro di biahe.
Cada seguro tin nan propio regla y procedura nan cu mester tuma luga. AZV ta recomenda tur biahero pa cumpra nan seguro debi cu na momento cu mester haya nan mes den un emergencia unda cu tog ta keda interna den hospital ta gastonan cu por bira hopi halto. Pesey mes ta bon pa tin e seguro di biahe lo cubri esaki directo di e hospital den exterior te na e suma di e pakete cu a cumpra.
AZV ta keda duna informacion den e parti aki mirando cu ainda tin aseguradonan cu no ta na altura di esaki y AZV ta haya yamada pa cubri e gastonan, pero den un caso asina AZV no por cubri ningun gasto cu ta den exterior.
Actualmente AZV ta haya dos pa tres caso pa aña cu tog ta bin haci un peticion na AZV debi cu e personanan a biaha sin un seguro di biahe. Segun Vocero di AZV Solange Tchong lamentabel ta cu AZV no por cubri gastonan di accidentenan cu ta tuma luga den exterior.
Den e prome kwartaal di 2023 AZV a haya un caso na unda cu un cliente a biaha pa Europa y asina mes cu e persona tabata sigura cu su seguro di biahe, tog e la haya su mes cu gastonan hopi hopi halto cu e mes a keda sorprendi y a comunica cu AZV, Pero lamentablemente AZV no por haci nada.
Nos no mester tapa wowo pa gastonan inespera debi cu malesa por yega inespera na cualkier momento y tin ora hasta na e momento cu kisas no kier, principalmente ora cu ta bay cu vakantie unda cu a bay cu e pensamento pa diberti.
AZV a tuma nota tambe cu tin diferente companianan cu ta ofrece e seguro di biahe unda cu tin diferente opcion riba diferente presupuesto. Si mester mira e historia di AZV berdad algun aña atras a pensa cu kisas e parti aki lo por tabata un posibilidad pa AZV mes ofrece, pero AZV a laga haci un estudio y a prueba cu lo e no ta factibel pa AZV carga e responsabilidad aki, banda di e responsabilidad grandi cu AZV ta carga caba di e fondo di AZV cu ta drey rond di 480 miyon pa casi 500 miyon pa aña.
AZV a scoge pa laga e area aki pa comercio y nan por desaroya riba e parti aki. Te dia di awe AZV no ta ofrece un seguro di biahe, sinembargo si ta recomenda pa semper e cliente cumpra e seguro adicional na momento cu e ta bay di biahe, pero na mes momento ta importante pa cada asegurado informa nan mes bon riba e paketenan cu tin.
Tin diferente paketenan unda cu hasta ta cubri si mester perde e maleta y otro componente nan cu por pasa durante di biahe banda di e salud. Na momento cu un incidente pasa den exterior AZV no ta cubri esaki, pero asina cu yega Aruba AZV lo cubri e asegurado y lo e haya su tratamento na Aruba na momento cu e yega Aruba.
Click aki bao like y share
1 comment
[…] Source link […]