ORANJESTAD,Aruba
Virma ta traha cu hopi amor pa su pashentnan
Dr. Horacio E. Oduber Hospital a saca nan empleado di luna di december 2019, kende ta un persona hopi stima pa su coleganan den e departamento di ambulante zorg. Den un ambiente yena di felicidad a sorprende Virma Croes-Boekhoudt cu e reconocimento bunita di ta empleado di luna di december 2019.
Virma ya tin 41 aña ta laborando na Hospital. Prome como studiante y despues como ziekenverzorgende riba varios departamento. Virma semper ta cla pa yuda, duna asistencia na pashent y nan famia y duna bon informacion con pa sigui cu cuido despues na cas. Tambe e ta yuda coleganan haci triage cu e pashentnan pa oogkamer pa asina e preparacion por bay mas lihe. Virma ta un persona hopi honesto y serio den su trabou y ta hasta coregi un pashent cu no ta tuma remedi na e forma corecto. Ademas, Virma ta durf di tuma iniciativa y semper ta amabel. E tin hopi amor pa su trabou y ta aprecia pa tur su coleganan.
Tabata un sorpresa grandi pa su persona ora cu nan a anuncia cu e la bira empleado di luna. Virma Croes-Boekhoudt ta splica cu e ta sinti su mes hopi satisfecho ora cu pashentnan bay cas bon. Ela traha den varios departamento manera klasse 1, klasse 2, intern y despues el a bay traha den ambulante zorg.
Filomena Brooks-Doncker, zorgmanager ambulante zorg, a duna di conoce cu no tabata dificil pa scoge Virma Croes-Boekhoudt como empledado di luna. Virma ta un persona hopi stima riba e departamento y tin hopi aña laborando na hospital. E ta traha den ambulante zorg pa basta aña y ta un persona hopi profesional den su trabou, asina Filomena Broeks-Doncker a duna di conoce. Tur dia cu e yega trabou, e tin un profesionalismo tremendo. Hopi biaha e empleadonan mes ta puntra Virma pa informacion, pasobra e tin hopi experencia trahando den hospital y semper e ta habri pa yuda y splica. Virma ta eherece su profesion cu hopi amor pa su pashentnan y esey e ta keda demostra tur dia. “Ademas, e tin hopi pasenshi cu pashentnan pero tambe cu su coleganan. Semper e ta bay the extra mile pa su coleganan. Tambe e ta un persona, aunke bis’e pa slowdown un tiki semper e kier sigui. E ta un persona habri, ta gusta traha cu hende y ta hopi amabel”, Filomena Brooks-Doncker a duna di conoce.
Virma ta un bon ehempel pa otro coleganan y a demostra di merece e titulo bunita aki. Pabien Virma!
