Dia 25 di yanüari 2022 Sector Agricultura, Medio Ambiente y Naturalesa di Ministerio di Salubridad, Medio Ambiente y Naturalesa a otorga un permit di exportacion pa exporta cinco dolfijn cu tabata permanece na Sea Aquarium.
Na juni ultimo, e cinco dolfijnnan a keda transporta pa Arabia Saudita. Un di nan a fayece na fin di augustus 2022. E Fundacion Animal Rights (e Fundacion) a apela contra e permiso di exportacion di 25 di januari 2022, segun e Fundacion e estadia na Arabia Saudita no ta na bienestar di e dolfijnnan.
Den e veredicto di 19 di october 2022, Corte a declara e apelacion aki no
admisibel pa dos motibo. E prome motibo ta cu e Fundacion ta laat cu e apelacion. Na januari 2022 e Fundacion no tabata sa di e existencia di e permiso di exportacion y no por a actua e momento ey, pero for di april 2022 e Fundacion tabata tin suficiente informacion pa por a tuma accion. Sinembargo, te na juni 2022 e Fundacion a apela contra e permiso di exportacion y pues e ta laat pa cu esaki.
E di dos motibo cu ta haci cu e apelacion no ta admisibel ta cu e Fundacion no tin interes huridico den e apelacion. Un apelacion admisibel ta exigi cu e proponente di e apelacion mester tin un interes huridico. E resultado cu e proponente di e apelacion ta aspira, mester ser logra efectivamente y e realisacion di e resultado aki mester tin un significacion efectivo pa e proponente di e apelacion aki. Solamente un interes formal of fundamental no ta suficiente pa esaki. Anulacion di e permiso di exportacion no ta pone cu e dolfijnnan ta regresa Corsou ni tampoco ta pone cu nan lo muda pa otro luga. Pa esaki mester di colaboracion di e propietario nobo na Arabia Saudita. Tambe e Fundacion no a
fundamenta dicon ta rekeri anulacion di e permiso di exportacion pa consulta cu e actual propietario di e dolfijnnan.
Corte tambe a trata e argumentonan di e Fundacion tocante contenido den su veredicto apesar cu esaki no tabata necesario mirando e declaracion di no atmisibilidat. Den caso cu e apelacion lo tabata admisibel, e argumentonan aki no por a yega na un anulacion di e permiso di exportacion. A base di e ley y regulacion vigente, pa otorgacion di permiso di exportacion den e caso aki no mester husga e condicionnan di bida na e pais di yegada di e animalnan cu ta keda exporta. E motibo pa kico e dolfijnnan a keda exporta no ta relevante pa hustifica e permiso di exportacion. Tambe a cumpli cu tur ley y regulacion
vigente.
