Resientemente Tourism Corporation Bonaire (TCB) a hasi un investigashon estilo ‘quick scan’ pa pronostiká e temporada di verano ku ta kuminsá mas òf ménos na mitar di luna di mei 2022 i ta dura te sèptèmber 2022. Tradishonalmente nan ta konsiderá e lunanan di verano komo ‘low season’ pa Boneiru i área karibense. Sinembargo TCB ta verwagt mihó resultadonan di verano kompará ku e sifranan di promé ku e pandemia.
Segun Expedia, partner turístiko di Boneiru, 81% di e biaheronan tin intenshon di bai por lo ménos ún biaha ku vakansi den e promé i e di dos mitar di 2022 ku nan famia i amigunan. Tres di e sinku biaheronan ta dispuesto pa paga gastu èkstra pa hasi nan biahe mas sostenibel. 49% a bisa ku nan lo skohe un destinashon ménos drùk pa redusí e efektonan di sobre-turismo. TCB ta reakshoná riba e demanda ‘niche’ akí pa medio di reposishoná Boneiru i su esfuersonan di komunikashon pa mustra nos balor i pa kumpli ku e deseo ‘niche’ di e biahero.
TCB a mira un bahada leve na luna di desèmber 2021 komo konsekuensia di Ómikròn i otro faktornan, pero a konstatá tambe un oumento fuerte di e reservashonnan pa e promé seis lunanan di aña 2022. For di luna di mei 2022 e perspektivanan di TCB pa e 3 lunanan binidero ta positivo: 76,7% mas haltu ku aña pasá. E perspektivanan mas importante pa kresementu ta keda registrá for di merkadonan, manera Canada, Bélgika, Suisa, Alemania, Merka i Hulanda. Tuma nota: e perspektivanan ta basá riba pasashinan ku avion efektivamente kumprá pa bin Boneiru.
‘Nos ta sumamente kontentu di por lansa nos esfuersonan nobo di komunikashon riba nos merkadonan primario. Na e momentu akí nos ta intensivá nos kolaborashon ku partnernan manera American Airlines, Delta i United, miéntras nos ta inspirá i invitá biaheronan riba henter mundu pa bin eksperensiá nos kultura lokal, nos naturalesa, nos patrimonio i nos hendenan’, segun direktor di TCB, Miles B M Mercera.
E esfuersonan di TCB ta enfoká riba e merkado norteamerikano i nan ta basá riba un tempu di espera di 115 dia konforme e komportashon di reservashon di e biahero merikano. Na fin di luna di mei 2022 TCB ta lansa un kampaña amplio di ‘branding’ pa Boneiru den region norteamerikano, ku enfoke riba merkadonan importante manera Florida, Connecticut, Illinois, Indiana, Michigan, Minnesota, New Jersey, Ohio, Pennsylvania, Wisconsin, New York, Atlanta i Houston. E meta ta pa inspirá hendenan pa biaha pa Boneiru den e di dos mitar di 2022.
Pa stimulá e reservashonnan i biahamentu mas aleu durante e lunanan di verano, resientemente TCB a anunsiá e Siman di Ròm Boneiru ku lo tuma lugá for di 14 te 17 di yüni 2022. Pa mas informashon: www.bonairerumweek.com