Recientemente un persona a declara durante un entrevista den un programa di deporte cu San Nicolas no tin “leader”. No ta mi intencion pa perde mucho tempo riba e personahe cu a haya ta bon pa expresa un opinion sin base di e parti di Aruba cu ta obvio e no conoce drechi. Lo mi sugeri tur interesadonan pa wak e papel importante cu San Nicolas a hunga den desaroyo di Aruba su economia, cultura, musica y deporte. Lamentablemente San Nicolas ta e parti di Aruba cu apesar di a contribui grandemente na desaroyo di e Isla, a wordo neglisha por completo. Durante campaña nos ciudad ta haya tur sorto di atencion y no ta falta promesanan di lo debolbe San Nicolas su “grandesa” di pasado, pero realidad di bida ta cu San Nicolas a para bira un “ghost city”. Un ciudad cu di 8 or di mainta te cu 4 or di atardi ta practicamente bandona, pasobra mayoria di su ciudadanonan ta baha cu solo bay Pabou di Brug pa por acudi na nan trabou y regresa anochi cu luna na nan hogar. Hasta ora nos hendenan di Pariba di Brug ta desea di pasa un anochi ameno, mester atrobe bay na localidadnan situa Pabou di Brug.
Tin suficiente motibo pa splica e fenomeno di abandono di San Nicolas. No mester ta ningun sorpresa pakico un grupo grandi ta dicidi despues di tempo muda bay biba mas cerca di nan trabou. E ta duna nan e oportunidad di dedica mas tempo cu nan famia. Menos tempo pa yega trabou y regresa cas, vooral si mester depende di transporte publico. E lo nifica tambe menos gasto di gasolin y di mantencion di nan auto. Un otro factor cu ta haya masha poco atencion ta e falta di siguridad. Mayoria di atencion pa siguridad ta concentra Pabou di Brug y vooral den e area di hotel. Apesar di tur contratiempo lo bo no scucha ningun momento keho di parti di nos hendenan di San Nicolas, pasobra nos di San Nicolas a siña biba cu loke nos bon Dios a buta riba nos caminda. Nos a siña biba cu scarsedad. Nos a siña biba tambe cu e hecho cu un bes pa aña durante e periodo di Carnaval y cada 4 aña durante eleccion, San Nicolas ta gosa di atencion total.
Nos semper a keda contribui na desaroyo di Aruba y awor a yega e tempo pa nos cuminsa exigi respet pa nos ciudad. “Enough is Enough”. Nos ta cansa di wordo manipula cu promesanan falso pa despues wordo lubida masha liher. Ta basta cu nos ta keda acepta cu esnan responsabel pa promove economia di nos Isla, ta waak nos bondad y humildad pa debilidad y ta keda ignora nos. Den e siguiente gobernacion mester crea e puesto di un minister cu tin como encargo tembe desaroya San Nicolas, no cu promesa pero cu hechos. A yega tempo cu empresnan chikito haya e oportunidad di por inverti den San Nicolas. A yega tempo pa gobierno cuminsa muda departamentonan pa San Nicolas. A yega tempo cu lo inverti den crea espacionan pa famia por diberti sanamente sin cu mester preocupa pa nan siguridad y a yega tempo pa tin claridad riba reapertura di un refineria state of the art. Ay yega tempo pa implementa transporte publico gratis, cu lo ta un ayudo pa e clas trahador cu tin di move di un banda di e Isla pa otro. Ciudadanonan di San Nicolas tambe merece un manece nobo y mihor!