Departamento di Enseñansa Aruba (DEA) ta informa cu e vakantierooster pa e añanan escolar/academico 2023-2024 y 2024-205 y e ATV-dagen Onderwijspersoneel pa añanan calendario 2023, 2024 y 2025 ta aproba y publica riba website di DEA www.ea.aw.
Minister di Enseñansa di Aruba ta aproba e fechanan di vakantie di scol. No obstante tin diferente partido envolvi den e procedura.
Con ta scoge e fechanan di vakantie?
E vakantierooster pa cada aña escolar ta wordo formula conforme e “Regeling lengte schooljaar en maximum aantal vakantiedagen” (AB 1988 No. GT13) y liñanan di guia cu ta indica cu mester tene cuenta cu entre otro e fechanan di examen y dianan oficial di fiesta. Den esaki ta trata na tene mas tanto cuenta posibel cu e mucha, e maestro y e curiculo.
Ken ta scoge e fechanan di vakantie?
E instancianan envolvi den e proceso ta Departamento di Enseñansa Aruba (DEA), Dienst Inspectie van het Onderwijs, Sindicato di Maestro di Aruba (SIMAR) y e Directivanan di Scol. E Directiva di Scol ta esun encarga pa representa interes di su scol(nan). E procedura ta como lo siguiente:
Departamento di Enseñansa Aruba (DEA) ta e instancia responsabel pa formula e
concept vakantierooster y pa stipula e ATV-dagen pa Onderwijspersoneel (conform regeling, richtlijnen); Dienst Inspectie van het Onderwijs, SIMAR y e Directivanan di Scol ta haya e concept pa duna feedback y input; Finalmente e proposicion ta bay pa Minister di Enseñansa di Aruba pa aprobacion.
Dicon sa tin cambio den e vakantierooster? E comienso y e final di un aña escolar, como tambe e fechanan di examen ta fluctua hunto cu dianan internacional di fiesta manera Diaranson di Shinishi, Diabierna Santo y Pasco Grandi.
E fechanan di examen (eerste y tweede tijdvak) ta wordo stipula pa Ministerie van
Onderwijs, Cultuur en Wetenschap na Hulanda. Aruba mester mantene su mes na e fechanan aki.
Vakantie y Leerplicht
E ley di enseñansa obligatorio ta na vigor na Aruba. Cu esaki pais Aruba a tuma e
obligacion pa garantisa y realisa e derechonan di cada mucha cu ta cay bou di e ley aki. Tur mucha for di 4 aña te cu 16 aña cu ta biba na Aruba ta suheto di e ley di enseñansa obligatorio. Ley di Enseñansa Obligatorio ta mantene su mes na e dianan di vakantie di scol aproba pa Minister di Enseñansa di Aruba. Si un alumno cu ta cay bou di enseñansa obligatorio falta scol sin permiso prome of despues di un vakantie nos ta yama esaki “absentismo di luho”. Tin circunstancia na unda e alumno por haya dispensacion. E mayornan/cuidadonan por entrega un peticion por escrito solamente cerca e director di scol.
Mas informacion Pa mas informacion di e procedura pa yega na un vakantierooster y pa download e vakantieroosters oficial, bishita website di DEA: ww.ea.aw. Tambe por haya mas informacion tocante ‘Leerplicht’ door di busca Enseñansa Obligatorio na letter of Leerplicht na letter den e alfabet menu riba dicho website. Sigui Departamento di Enseñansa Aruba riba Facebook y/of Instagram @EducationAruba pa keda na altura di tur informacion.
