Utilities Aruba a organisa un reunion importante cu diferente NGOs y Stakeholder pa presenta e resultadonan di un estudio di Impacto Ambiental cu a wordo haci pa un Parke di Molina adicional pa Aruba den e area di Rincon. Durante e reunion e compania ESL di Jamaica a presenta e resultadonan di e estudio y a comparti tambe informacion di un encuesta cu a wordo haci den comunidad.
E obhetivo principal di e reunion di consulta tabata pa presenta e resultadonan di e ‘Environmental Impact Assessment’, cual a inclui un evaluacion di impacto riba medio ambiente di e parke di molina di biento proponi na Ricon y area. Como parti di e evaluacion aki, a distribui un encuesta entre e comunidad di Aruba colectando opinion y perspectiva tanto di residentenan di Aruba como tambe Arubano bibando den exterior. E meta tabata pa capta diferente perspectiva y sigura cu e comunidad local a wordo scucha y considera den e proceso di decision.
Representantenan di gobierno y organisacion no gubernamental (NGO) a ser invita pa participa na e evento, haciendo di e evento un plataforma crucial pa colaboracion y discusion.
Durante e evento di consulta, Utilities Aruba a facilita un sesion interactivo cu a duna e participantenan e oportunidad pa haci preguntanan importante, comparti opinion y contribui cu sugerencianan valioso. E evento a fomenta un ambiente di colaboracion y dialogo habri entre e participantenan y esnan haciendo e estudio.
Utilities Aruba ta realisando diferente estudio pa sondea e posibilidadnan pa expande e capacidad di generacion di energia sostenibel pa motibo cu esaki a bira un necesidad. Compara cu otro isla y paisnan, Aruba tin un abundancia di biento cual por brinda nos isla hopi posibilidad y beneficio. Un di e dos Parke nan di Molina di biento cu molinanan mas moderno lo genera mas energia cu actualmente ta e caso. E expansion aki por yuda baha e costo di energia na Aruba, contribui na combati cambio climatico y ademas e por hunga un rol crucial den yuda crea un industria nobo pa Aruba cual ta Hidrogeno Berde (Green Hydrogen). Aruba por posiciona su mes como un pionero y lider den Caribe.
