Na aña 2022, Kuerpo Polisial Hulanda Karibense (KPCN) a pidi ‘Rijksvastgoedbedrijf’ (RVB) komo hürdó un investigashon di klima den e edifisio di KPCN pa motibu di diferente keho tokante e ambiente di trabou. For di e investigashon a resultá ku tin diferente área di atenshon ku beskein a akumulá, i ku ta influensiá e kalidat di aire den e edifisio. Ounke esaki su nivel tabata di tal manera ku e no ta peligroso pa trahadónan, e tabata rekerí atenshon inmediatamente. Komo konsekuensia di e resultadonan, RVB a bini ku un proposishon pa medidanan agudo i un plan pa ehekutá e rekomendashonnan di e rapòrt di investigashon di manera struktural. E plan struktural di akshon tabata repartí riba término kòrtiku i término largu. E akshonnan agudo mesora a keda implementá i un kalkulashon di e situashon a demostrá ku esaki a yuda mehorá e situashon drástikamente. Di otro banda, e akshonnan riba término largu tabatin algun retraso pa motibu di materialnan ku tabatin mester pa implementá e trabou.
En espera di e implementashon di e akshonnan riba término largu, KPCN i RVB ku regularidat tabata laga hasi mantenshon den e edifisio i tabata mantené e trahadónan na altura di e situashon. Na luna di mei di 2023, KPCN a haña bishita di inspekshon di labor ku karta di atvertensia en konekshon ku e situashon den e edifisio i a indiká ku e akshonnan riba término kòrtiku mester ta implementá promé ku yüni 2023 i ku mester a bini ku plan klaro pa fin di yüli pa e akshonnan riba término largu. Resientemente RVB a duna un splikashon di e situashon i a palabrá ku lo bin un investigashon nobo. Tambe a palabrá ku lo tuma otro medidanan pa atendé ku posibel situashonnan indeseabel, pero e retraso a persistí.
En konekshon ku esaki e Tim di Maneho di Kuerpo (KMT) a disidí pa muda algun ofisina pa un otro lokalidat den e edifisio. E ofisinanan ku pa e motibu aki no tabata den uzo mas, tabata ubiká na e sitio ku tabata konsiderá áreanan di prioridat den e investigashon anterior.
Djabièrnè, 14 di yüli, trahadónan di KPCN huntu ku representantenan di sindikato NAPB a disidí pa traha pafó di e edifisio debí na preokupashon i seguridat di nan salú. Durante di dia, e Despues di reunion ekstenso entre Maneho di Kuerpo, RVB, NAPB i ekspertonan ophetivo i eksterno por a informá i trankilisá tur partido enbolbí, ku e edifisio no ta peligroso pa e trahadónan. Despues di esaki trahadónan di KPCN a kuminsá traha den edifisio bèk.
Apesar di esaki, trahadónan no ta obligá pa traha den e edifisio i kontinuamente lo keda na altura di tur stap ku tuma pa mehorá e situashon. Riba djabièrnè ekspertonan a midi atrobe den e edifisio i asina ku e resultadonan ta konosí lo kompartí esakinan ku e trahadónan i nan representantenan.
KPCN, RVB i NAPB ta haña ku salú di e trahadónan ta di sumo importansia i lo keda traha huntu na un sitio di trabou saludabel i seif pa un i tur.
1 comment
[…] Source link […]