ORANJESTAD,Aruba
Pashentnan na Colombia: Awe 27 di maart 2020 AZV a regla un charter di SARPA cu lo yega 5or di atardi for di Colombia cu un total di 33 cliente di AZV. Ta spera pa cada cliente di AZV cu yega for di Colombia mantene nan mes na e instruccionnan di Departamento di Salud Publico y pues cumpli cu keda cas. Pashentnan cu mester haya tratamento den exterior: Door cu e frontera cu Colombia ta cera no ta posibel pa manda pashent nobo Colombia sin mas. AZV ta bezig hunto cu gobierno di Aruba pa bin na otro solucion pa loke ta casonan di extremo urgencia y cu no tin coronavirus. Ta importante pa cada cliente di AZV corda di tin nan paspoort na ordo, esta valido. Pashentnan pendiente pa haya tratamento den exterior Pashentnan pendiente pa haya tratamento den exterior cu no ta urgente (no ta casonan di bida y morto) lo mester warda por lo pronto. Servicio di AZV Pa inscripcion, prolongacion y of peticion ta pidi e cliente pa email AZV na klantenservice@uoazv.aw y pa preguntanan general por email AZV na: info@uoazv.aw AZV Aruba App Tin 17000 asegurado di AZV cu ya a download e AZV Aruba App y tin nan digi-ZorgPas. Ta pidi tur e personanan aki pa update e AZV Aruba App y asina lo por ricibi pronto notificacionnan di AZV. Adicionalmente tin e oportunidad pa aplica cerca AZV como un ‘usuario verifica’, esaki ta nifica cu abo como cliente di AZV kier registra un adulto pa kende bo ta responsabel por ehempel pa busca su remedinan na botica. Email AZV na klantenservice@uoazv.aw pa bira un usuario verifica den caso cu bo ta desea. Pa tur esnan cu ainda kier haci uzo di e AZV Aruba App, bo ta bay den Google Play of App Store y download e AZV app.
