Na honor di e 35 aniversario di Universidad di Aruba y Dia di Himno y Bandera, e porta nan di Universidad di Aruba a habri pa comunidad di Aruba. Esaki tawata e prome biaha cu Universidad di Aruba a celebra e dia di fiesta nacional, 18 di maart, na e forma aki.
Universidad di Aruba, a yama bon bini na entre otro esnan cu a forma parti di “Nos Patrimonio” den e ultimo 35 aña como studiante of graduado, pero tambe personanan cu semper a admira e edificio historico.
Durante e dia, bishitantenan a disfruta di actividadnan manera exhibicion di UA su coleccion di arte, pintura di arte bibo cu artistanan local, musica, cuminda crioyo, bebida, entretenimento pa tur hende y mucho mas. Por a ricibi diferente tour di e campus pa admira entre otro, e jardin nan espectacular di UA.
Dia di Himno y Bandera ta un ocasion special unda nos por uni nos mes pa celebra nos cultura, diversidad, y e spirito vibrante di nos comunidad na Universidad di Aruba. Esaki tawata e vision tras di e actividad aki y por ta satisfecho cu a logra.
Un pabien y danki na e comision organisador di e evento aki y voluntarionan cu a percura pa pone un evento espectacular den otro pa ilustra na un manera unico cu Universidad di Aruba ta di Aruba, y di nos tur.
Un danki di curason na tur nos sponsornan cu a haci e evento aki posibel, Setar NV, Tropical Bottling Company, Aruba Tourism Authority, Aruba Airport Authority, Caribbean Mercantile Bank, De Palm NV,RAYO, BDO y Comision Celebracion Dianan Nacional.
