Unit narcotica cu otro accion exitoso

Diabierna mainta Unit Narcotica a tene un accion y a haci un entrada hudicial na Kamay. Na e sitio a detene un persona. Na e sitio a detene un hende homber naci na Aruba cu inicial J.P.E. enconexion cu bendemento di marihuana, cocaina y como tambe xtc.

Na e sitio a confisca basta droga. E investigacion ta andando ainda y no ta descarta cu lo por tin mas detencion.

Unit Narcotica ta un unidad di Cuerpo Policial Aruba cu oficialmente a wordo lanta 1 augustus 2023. E unidad ta investiga tur loke ta bendemento di droga for di casnan, ariba caya, delivery, plataforma social y hasta area di hotelnan. Tambe e unidad ta investiga tur droga cu wordo intercepta pa Douane, US Customs na aeropuerto, door di ambtenaarnan di KIA y tambe tur droga encontra durante cualkier control policial.

Pa Cuerpo Policial Aruba por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nos tiplijn di Polis cu ta: 11141. Nos ta garantisa cu bo ta keda anonimo.