Unit narcotica cu dos etencion, hopi droga y arma di candela confisca

Diasabra den oranan di atardi Unit Narcotica conhuntamente cu polis di San Nicolas a tene un accion grandi na San Nicolaas unda a haña un plantacion di marihuana y bastante pakete (kilo) di droga den e cas. Tambe a canta bingo ora cu a haña un arma di candela y bastante municion.
Unit Narcotica a detene un homber di inicial A.A.M. naci na Aruba di 32 aña y un dama inicial R.N.A. naci na Aruba di 25 aña di edad. No ta descarta cu lo por tin mas detencion.

Unit Narcotica ta un unidad di Cuerpo Policial Aruba cu oficialmente a wordo lanta 1 augustus 2023. E unidad ta investiga tur loke ta bendemento di droga for di casnan, ariba caya, delivery, plataforma social y hasta area di hotelnan. Tambe e unidad ta investiga tur droga cu wordo intercepta pa Douane, US Customs na aeropuerto, door di ambtenaarnan di KIA y tambe tur droga encontra durante cualkier control policial.

Pa Cuerpo Policial Aruba por resolve mas caso cooperacion y informacion di pueblo di Aruba ta hopi importante, pesey nos ta pidi si bo tin cualkier informacion yama nos tiplijn di Polis cu ta: 11141. Nos ta garantisa cu bo ta keda anonimo.