Un unidad di genio procedente di Ehercito Real di Hulanda tin ehercicionan durante e siguiente periodo na Corsou y Aruba. E ehercicionan cu e nomber ‘Caribbean Engineer’ ta cuminsa dia 25 di September y tin un duracion di cuatro siman.
E unidad, Batayon 101 di Genionan, ta consisti di genionan/arquitectonan cu tin diferente experticio. E genionan ta militar, alavez ta specialisa riba tereno di construccion. Durante e periodo venidero nan ta eherce un programa cu di un banda ta consisti di diferente entrenamento militar, y di e otro banda nan lo ta activo cu mas tarea den construccion pa diferente departamento, entre otro Defensa mes.
Asina e expertonan den construccion bou di instruccion di Carmabi lo bay cuminsa traha den e area di naturaleza na Shete Boka (Corsou) riba un toren di vigilancia traha di palo. Den e area di naturalesa na San Wilibrordu (Corsou) nan lo instala un labado y lo realiza construccion di un caya den direccion di un toren nobo di observacion di flamingo, un toren cu ainda mester keda construi. Tambe pa Defensa mes e unidad di genionan lo tin trabou ta haci. Na Wakawa (Corsou) y na Kazerne di Marina Savaneta (Aruba) e cayanan lo keda mehora y nan lo cuminsa cu construccion di un edificio pa drumi cu oficinanan.
Entrenamento den circunstancianan climatologico cu desafionan
Pa e unidad di Hulanda, ehercicionan na Aruba y Corsou tin un balor agrega hopi halto. E circunstancianan climatologico den Region Caribe Hulandes ta di compara cu e circunstancianan den regionnan di hopi area di mision. P’esey e ehercicionan aki ta duna e militarnan di ehercito e chens pa por trein den circunstancianan similar. E unidad ta consisti di mas o menos 90 militar cu lo hospedá i keda reparti riba e dos islanan. Pa e actividadnan di construccion lo transporta 30 vehiculo (militar) di construccion y 20 container, riba barco direccion Corsou. E material aki a yega den haf di Corsou caba. E ehercicio ‘Caribbean Engineer’ lo dura te cu 19 di October.
