KRALENDIJK,Bonaire
Riba djabièrnè 17 di yanüari Unicef Hulanda (Unicef NL) a fasilitá un reunion tokante un vishon pedagógiko pa e programa di BES(t) 4 Kids i nan partnernan na Boneiru. Motibu pa e reunion tabata resultadonan i rekomendashonnan den e análisis di situashon di derechonan di mucha na Hulanda Karibense, ku nan a publiká na luna di òktober 2019. Un punto di salida importante pa e reunion tabata e ‘Komponentenan pa un Vishon Pedagógiko – Bouwstenen voor een Pedagogische Visie’ di Entidat Públiko Boneiru ku nan a desaroyá a base di algun seshon ku Entidat Públiko Boneiru a organisá na aña 2017 i ku ta keda sirbi komo kuadro di referensia pa elaborashon mas aleu i implementashon di un vishon ku sosten di henter nos komunidat tokante kon pa anda ku mucha. Un grupo di personanan entusiasmá ku ta traha den akohida di mucha, akohida despues di skol i den enseñansa i tambe empleadonan públiko a akudí na e reunion ku por sierto tabata bon bishitá.
Meta di e reunion tabata pa sòru pa mas komprenshon tokante importansia di stimulashon tempran i un klima protektor pa desaroyo optimal di e mucha i pa alkansá konsenso tokante un konsepto di vishon pedagógiko, kompartí entre BES(t) 4 Kids i partnernan riba nos isla. Durante e reunionnan e interesadonan a mustra riba importansia di e vishon pedagógiko pa enfatisá ku tantu dunadónan di kuido komo mayornan mester ta emoshonalmente disponibel pa nos muchanan i ku nan mester ekspresá amor den nan andamentu ku mucha i rekonosé ku amor ta hopi importante den desaroyo di mucha. ‘Akohida pa mucha kualitativo ta eksigí pa organisashonnan di akohida di mucha ta traha a base di un vishon pedagógiko. E vishon aki ta determiná kon ta duna kontenido na diferente aspekto di akohida di mucha, inkluso e strategianan pedagógiko i di enseñansa ku profeshonalnan ta usa. Pa reinforsá kalidat pedagógiko, BES(t) 4 Kids ta sostené organisashonnan di akohida di mucha ku desaroyo i aktualisashon di nan vishon pedagógiko. Un reunion manera esaki, i traha huntu ku UNICEF i tur partner riba nos isla, ta di gran balor’, segun Fleur Lagcher, mènedjer di programa di BES(t) 4 Kids.
Unicef NL a fasilitá tambe mesun tipo di reunion na Saba i Sint Eustatius dia 20 i 21 di yanüari. E kònsùltent regional sra Sian Williams, kende desde 1993 ta establesé na Jamaica i tin hopi eksperensia ku desaroyo di maneho i programa pa desaroyo di mucha chikitu (ECD) den Komunidat Karibense (CARICOM), a fasilitá e reunionnan. ‘A base di desaroyo di serebro di un mucha nos sa ku eksperensia, tantu bon komo malu, tin un impakto riba kon un mucha ta lanta. Duna kariño, hunga, papia i skucha, i duna guia kuidadoso, tur ta yuda un mucha krese sosialmente i emoshonalmente i siña kon e mester komportá su mes. Deskuidá un mucha, no duna atenshon na un mucha of pió ainda, hasié doló, ta okashoná daño i retraso den su desaroyo. Ta hopi difísil pa remediá daño ku a hasi na un mucha komo konsekuensia di falta di stimulashon òf di strès’, asina Williams a splika.
Lo usa e palabrashonnan ku a hasi durante e reunionnan komo base pa e ‘Communication 4 Development Trainings (C4D) – Entrenamentu di Komunikashon pa Desaroyo’ ku mas lat den e aña aki UNICEF NL ta bai organisá riba nos islanan. Durante e entrenamentunan e tim di BES(t) 4 Kids i nan partnernan lo atkirí konosementu i abilidatnan tokante sistemanan di enfoke riba komunikashon di UNICEF ku nan ta usa mundialmente pa enbolbí komunidatnan i promové komportashon i kambio sosial. ‘Riba kada un di nos islanan e interesadonan durante e reunionnan a pone énfasis riba e nesesidat pa akumulá ‘input’ i ‘ownership’ di e vishon di un komunidat mas ámplio. Esaki ta demostrá determinashon di e profeshonalnan pa hasi uso di un atendementu partisipativo na momentu di atendé ku nesesidatnan di nan gruponan di enfoke. E entrenamentunan di C4D lo sostené e tim di BES(t) 4 Kids i nan partnernan ku tradukshon di e vishonnan pedagógiko den strategianan di komunikashon efektivo ku ta enbolbí tantu edukadornan komo mayornan’, segun La-Toya Charles, lider di proyekto di UNICEF NL Hulanda Karibense.