Un siman di sabor culinario

Saba su Lobsterfest anual lo wordo celebra e aña aki un biaha mas, y e celebracion culinario di e aña aki ta combina pa prome biaha cu e Rum Fest local. E evento cu ta wordo organiza pa Saba Tourism Bureau cu restaurantnan local y Unspoiled Queen Liquors ta tuma luga di dialuna 6 di november te cu djadumingu 12 di november 2023.

Saba su Rum & Lobsterfest ta un evento di un siman largo cu ta celebra e famoso Spiny Lobster di e isla y su rumnan local. E festival di cuminda ta presenta un variedad di plato sumamente dushi cu ta exhibi lobster captura den e awanan di Saba Bank y prepara den estilo tradicional y innovativo, acompaña pa un seleccion di rum produci localmente. Ademas di e cuminda cu lo wordo ofreci, e evento lo inclui un programa di actividadnan cu lo tin como meta pa crea recuerdonan duradero y experiencianan compartibel pa tur participante. E eventonan programa pa e festival aki te cu awor ta:

– Test bo Taste Buds: diferente plato di Lobster, platonan inspira pa rum, cuminda y bebida den bar y restaurant.

– Lobster Rum Crawl: Un bar hop pa e participantenan experiencia diferente lugar den un anochi.

– Rum Hunt: Un buskeda di tesoro na un di e trails famoso di Saba.

– Un Booze Cruise: zeil riba lama durante sunset.

– Crafty Claws: Workshopnan creativo di diferente artista cu temanan inspira di Lobster y of rum.

Hende por biaha pa Saba for di St. Maarten den menos cu 12 minuut cu WinAir of disfruta di un biahe bunita di 90 minuut via Edge of Makana Ferry. Pa mas informacion, por bishita Sabatourism.com/rlfest of bo por bishita e pagina di Facebook y Instagram di Saba Tourism Bureau.

Mas detaye di Saba’s Rum & Lobsterfest lo ta pronto disponibel.