Despues di un sin fin di comentarionan negativo di parti di partidonan di oposicion y tambe di cierto medionan di comunicacion relaciona cu e recorte di 5% di salario di e ambtenaarnan y empleadonan di e entidadnan estatal, porfin e siman aki lo bay tin claridad riba e tema aki.
Pandemia global y su efectonan
Sin duda e recorte di salario cu 5% no ta algo cu a sosode pa prome biaha na Aruba. Hecho ta cu e recorte aki a bira necesario debi na e pandemia mundial cu a afecta Aruba seriamente, ya cu di dia pa anochi henter nos economia a cay den otro, ocasionando desempleo na gran cantidad, frontera di Aruba cera, hotelnan bashi y un pueblo bibando den panico y miedo pa motibo di e virus mortal di Covid. Den e situacion penoso aki Gabinete Wever Croes mester a negocia cu Hulanda pa haya sosten di likides pa yuda e parti financiero di nos pais y cual sosten ta basa riba un fiansa na un porcentahe di 0%. Finalmente un suma di mas di 900 miyon florin pais Aruba mester a fia for di Hulanda y p’asina contra aresta henter e desaroyo negativo cu nos pais tabata aden e momento ey.
Impuesto di Solidaridad di 8.2%
Sinembargo no mester lubida cu den pasado nos a conoce un situacion similar cu a afecta grandemente nos economia, nos finansas publico y empleo. Y esaki tambe a sosode bao di un gobernacion di MEP, esta na momento cu e refineria Lago a dicidi di cera su portanan na fin di maart 1985. E tempo ey Bestuurscollege di MEP a haya su mes obliga di introduci un solidariteitsbelasting di 8.2% pa henter Aruba. Aki e recorte di salario tambe tabata necesario y p’asina Aruba por a haya ayudo presupuestario (begrotingshulp) di 100 miyon florin for di Hulanda, cual ayudo tambe tabata basa riba un fiansa na Aruba.
Entrega adicional di 7.75% – 8.5%
E ley di impuesto di solidaridad a bin den efecto na 1986 durante Gabinete Henny Eman y lo mester tabatin un duracion di 2 aña (1986 y 1987) pero na final di e periodo aki Gabinete Eman a introduci un impuesto nobo di 4.1% pa aña 1988. Pues e gobierno di Henny Eman no a kita ningun medida di inmediato manera nan a priminti den campaña pa eleccion 1985 pero nan a cobra tur e impuestonan aki durante 3 aña largo. Fuera di e 8.2% na recorte di salario, e ambtenaarnan mester a entrega adicionalmente 7.75% cu un maximo di 8.5% di nan salario. Hecho ta cu Gabinete Henny Eman durante su periodo di gobernacion (1986-1988) no a debolbe e ambtenaarnan nan recorte di 7.75% – 8.5%, pero tur e ambtenaarnan mester a warda te ora cu MEP (Gabinete Oduber 1) a drenta gobernacion na 1989 y p’asina nan por a haya nan placa di recorte bek.
E siman aki nos ta para un biaha mas dilanti e decision pa loke ta trata e recorte di 5% di salario cu e ambtenaarnan lo mester haya bek den e luna aki mes. Naturalmente e cuerpo di ambtenaarnan por ta sigur cu nos Prome Minister Evelyn Wever Croes y tambe nos Minister di Finansa Xiomara Maduro lo sa di lucha pa trece un solucion definitivo, positivo, husto y digno na beneficio di e cuerpo di ambtenaarnan y esnan trahando den e entidadnan estatal.
