Ta sigur ku e rèptil grandi ku a wak djamars banda di Sorobon ta un
tipo di krokodel, kaiman òf aligatòr. Esakinan ta tipo di animal protehá pa lei. E
animal a muda pa e área ku palu di mangel den serkania awe djárason mainta.
Direktor interino di STINAPA Sjon van Essen, a deklará esaki den un rueda di
prensa. STINAPA a para búskeda di e rèpeptil na altura di Sorobon
temporalmente, pasó ta difísil pa mira e animal den e área ku palu di mangel.
Ta premirá ku e animal lo bandoná e área ku palu di mangel den oranan di
atardi mas lat.
Tipo di rèptil grandi manera krokodel, kaiman of aligatòr ta move mas stantu
durante sierto ora di dia, manera mainta trempan òf lat den atardi. P’esei lo
kontinuá e búskeda pa e animal awe mas lat den atardi. Ta ferwagt ku e bestia
por move despues atrobe den direkshon di Sorobon. Ei ta mas fásil pa wak e
animal. A sera Lac i Sorobon pa públiko te próksimo aviso despues di a konsultá
ku gezaghèber John Soliano.
Ora ku a determiná ki tipo di rèptil e ta, STINAPA ta tuma e medidanan
nesesario. E organisashion di naturalesa kier kapturá e animal mas lihé posibel.
STINAPA a regla un lugá kaminda e bestia por bai despues di kaptur’é.
Ta pidi tur hende pa no bai Lac i Sorobon. Ta importante pa STINAPA por hasi su
trabou den trankilidat. E animal a komportá su mes trankil te awor, pero por
bira agresivo si e haña strès.
Rangernan di STINAPA, banda di nan tareanan normal, ta esnan promé yamá
pa yuda den situashon di emergensia den área di Lac. Por ehèmpel ora tin
derame di zeta. Nan ta atendé tambe ku animalnan ku bo no ta haña
fásilmente na Boneiru. Danki na finansiamentu di e proyekto di RESEMBID
yamá ‘Lac Pa Semper,’ STINAPA a logra ku tin dos ranger tur dia trahando na
Lac. Esaki ta pone ku nan por aktua lihé den situashon di emeregensia. Nos lo
sigui informá públiko i nos ta gradisí pa tur forma di kolaborashon ku STINAPA a
risibí.
Un rèptil grandi awor den mondi di mangel, STINAPA ta vigilá moveshon pa tuma akshon
