Pa yubi naar. di Ruthy ( Maart 2009 )
Distinguido ……
Sr. Hubert “Yubi”Naar y famia, coleganan escritor, lesadonan di buki na papiamento, damas y caballeros, dushi publico presente, Aruba…..bon nochi
Pa mi ta un placer comparti algo di nos amigo Yubi, y mi ta contento cu niun hende a bisami awe nochi pa “no papia di mas” of “ pa tenele cortico “ – Mi ta kere cu Yubi ta hasi asina hopi ariba varios tereno , cu ni maske mi a yena dos papel A-4, ainda e ta poco.
Y no ta ami so ta esun cu lo papia cosnan bon y bunita di Yubi ..
Lagami menciona for di cuminsamento , cu mi no ta compananzi ni famia di compananzi , cu ta gusta hasi cosnan na su bienestar of su favor, pa cualkier posicion , puesto of titulo
( Bon, cu excepcion si bo invita mi bai come, pasobra mi no ta gusta cushina !!)
Mi ta laga tur otro cos un banda pa bay yena e stoma un crenchi, y ta orkan cu pasa,so por strobami di sali bai come. ! Kiermen, mi ta un version femenino chikito toch di Nanzi, kizas mi por jama mi mes …..Nanza. ( Ora mi tin mi baret di color cora of blauw bisti, nan sa puntrami si mi ta un fanatico di Chavez, pero mi ta bisa nan cu mi por ta un version femenino cu e nomber : Cha-visa…….si, cu buraco den mi man pa usa mi visa card ora mi biaha…
Yubi, bo ta wak….no tin hopi hende ta hari, ta abo so por bin cu cosnan mas humoristico ora bo ta dirigi bo mes na un publico.
Enfin. Lagami continua, prome cu awa cuminsa jobe.
Awenochi …palabranan lo resalta cu elogio y aprecio y amor, den algo pa un bon brother di mi di curazon, aunke su edad ta casi jega plafon, y ami ta bisti shimis y e ta bista carson ! Un algo di su talentonan y bendicion pa sigui alegra e curason !!!
Un anochi di literatura na papiamento , dedica na nos amigo Yubi Naar.
Yubi su curazon ta lombra, e ta grawata, e ta kishiki di contento , e sa, cu el a tuma un bon desicion. Pa skirbi Storianan y cuentanan gracioso na monton ! Anto con !!
Ta ken aki na Aruba no conose Yubi Naar ? Segun mi, e no sa ni mes, kico ta un bar !!
Mi no a topele nunca cu un botter di cerbez of glas di binja den su man….ta bloknoot cu pen ta su maleta cu e ta hiba cu ne tur caminda cu nan invite. Anto, den detaye y hopi biaha na color, e ta describi y gaba y of critica constructivamente nos talentonan local ariba tur tereno den su seccionnan den Diario.
( Bon, cu exepcion di mi buki “Mi bida den un dia….den silencio”…( Lagi ta frega ‘) .ainda mi ta sinta warda, mientras mi ta conta mi cabeinan blanco……
Mi tin tempo, ta awor numa mi ta na mitar caminda di mi bida !! El a lesa e prome parti si !!
Keremi , ora mi bisa boso, cu mi tambe sa con
dushi ta pa tende cu locual bo a skirbi of hasi a cai na agrado y a alegra mas curason., e sei ta sinti, pasobra hopi biaha mi a hanja bon compliment serca hende, despues di a skirbi y of recita un poema. Pero….danki Dios mi casa Johan ta para net banda di mi y ta percura pa mi baha for di mi nubianan na ora. Pa mi no keda pega ta zweef cu cabez hincha.demasiado largo ……pero awe nochi ……un otro color di biento den 3 gota pa dia ta ranca sali den forma di un “abrenuncia” y un stem chikito ta grita den mi curazon “ Oh My God……” danki cu mi por tawata un otro instrumento pa bo, den e forma aki…y comparti di curazon , algo dushi di e tremendo escritor aki, cu a hasi mil y un cos mas cu mi , den su bida, . Bon, mi no sa si e tambe awata un lider scout of cu el a jega di canta cu Tino Ruiz of Trio Los arubenos….
Y awe nochi….abrenuncianan lo skeiro den diferente idioma manera “ Oh me goedoe, Mi shon……Jesuse…….ora nan cuminsa lesa e tres bukinan di nos amigo Jubi Naar.
Na edad hoben Yubi a drenta e mundo exitante emocionante di Teatro y Carnaval.
Despues di un estudio , Radio y Television a bira su ramo especial, pero no a traha mucho largo den esakinan. .
Nan di, cu ami no por mira un microfoon, pero, keremi, Yubi tin 52 anja caba ta cana cu microfon den boca riba diamars na Bon Bini Festival y of den fin di siman !
E ta papia bai goal, pone e turistanan hari y riba dje , bati man !
E joke di holoshi den e kamber na hotel cu e kier bai coi …
Awe nochi, un anochi di boa, cu ta gusta come tjopsoy.cu speed di un morocoi…
Su otro bukinan ya publica , tokante e dia di San Juan, E segundo paraiso, cu na caminda mas buki cu mas informacion tocante Dera Gai……..y….Parha di lona…..pa sigui papia di De Vuyst.
Yubi a jega di contami cu e tawata practica hopi deporte den teamnan hunto cu dos tio masha stima y aprecia di mi, Joy Bergen ( actualmente activo como umpire den little league ) y Freddy Bergen, awe dfm, pero ta na unda tur e curpa di atleta di Yubi a keda anto ??? Di toothpick e lo a cana bai , sigui subi di peso na caminda, su schouder a cuminsa bira pisa, di tanto cos cu e kier hasi , pa porfin jega na e tienda di Benjo Pick, conosi como Chipi chipi, pa a reemplaza su uniformnan di deporte pa wayaberonan 3 x – ??
dorna cu “abrenuncianan color di biento den 3 gota di palabra “….un di nan ta sac – no, no sac bai abao, si e sac bai abao e ta keda plat plat. Mi ta purba bo sa, tin biaha mi ta kere cu mi tambe por ta un sorto di payaso pero mi ta mucho serio ! Pero….esei ta algo cu nos amigo Yubi ta hopi bon den dje, ora e ta un tremendo maestro di ceremonia den un Cas di Cultura completamente yen, anto e ta bin cu su remarcanan gracioso, pone tur hende hari . Algun anja pasa, Juan Chabaya Lampe, Padu del Caribe, si, Padu, nos tata di cultura y ami, como Lady Ruth, a dedica un di e festivalnan di Bon Bini na Yubi mes, sin cu e sa, nos a tuma over, pidi e microfon y den forma simpel pero di curazon a entrega Yubi un bunita cuadra di Padu, mientras ami a recita un bunita poema pe di curazon. Y mi a conta en breve na e turistanan ken ta Yubi Naar, kico asina e ta hasi pa Aruba. Awe, den 2009, Sr. Hubert “Yubi Naar” ta tene regularmente charlanan na diferente skolnan y klasnan na Aruba y constantemente su oficina na Diario ta yen di mucha cu kier bishitele y papia cu nele, anto, pa despues e keha cu e tin cu traha te den oranan laat di anochi, ta e mes gusta, ! Yubi a ricibi varios homenahe y reconocimento for di diferente gruponan di baile y di teatro y tambe di musica. Y awe nochi…..Yubi ta e centro di atencion cu e publicacion di tres buki pareu…..despues di a cana (un caminda di cruz) manera un cangrew , purba piki piew aki aya pa faya pa bo haya …of ta haya pa bo faya …of ta storianan di su yaya, despues di a bula waya. !
Mi ta pidi boso tur awor…..un aplauso pa un persona talentoso cu no ta tapa boca pa nada,
E sa cu su djentenan no lo cai asina lihe…..E por defende su mes bon. .
Yubi…… mi pabien cu bo tres bukinan nobo…..Di curason…… God bless.
You did your best…..and God did the rest.
El a pone e direccion di biento, bula den e direcionnan necesario pa e tres gotanan pa dia, sigui yena nos dushi Aruba cu hopi alegria , den e gritonan yen di energia “ Ta Yubi mes “!!!
Ta Yubi mes, Ta Yubi mes………Holooooooooo!!! Ata baina ki !!!
