ORANJESTAD, Aruba
E rapport cu Gobierno a pidi di operacion di Refineria di Aruba (RdA) ta kedando cla y ta hopi puito lo bula afo. Loke cu a hala atencion den e rapport preliminar aki ta cu Richard Arends via di un contracto firma cu RdA a cobra casi mey miyon florin den apenas seis luna pa trabou di consultancy. E hecho aki a sosode via di un contracto cu su compania di consultancy Horizon. Un hecho cu por wordo cataloga como un acto di un sinberguenseria.
A nombra Arends den e posicion di director dia 20 di october, 2016, bou Gobernacion di AVP. Un contracto den cual hasta ta poni cu si kibra esaki, mester compensa Arends durante 5 aña largo, y mirando e riesgo cu e posicion di director ta trece cune, hasta a pone un compensacion extra di 25%.
Awo mester wanta curason pa e suma cu Richard Arends a haya for di Gobierno di AVP pa e puesto di director di RDA, cu ta nada menos cu 22.375 florin pa luna. Aserca e ta haya un vakatieuitkering cu ta un luna di salario cu ta paga den e mesun luna cu Gobierno ta duna vakantieuitkering na ambtenaarnan. Tambe 1/8 parti di su salario anual paga den luna di januari na dje, e mesun suma atrobe den luna di november.
Ademas di e salario haltisimo, el a haya tambe vergoeding pa telefon, representacion y gasolin pa un suma total di 1050 florin. Mester a dun’e un auto di compania na balor di 80 mil florin, y cual mester cambia cada tres aña. Gastonan medico di dje y su famia; seguro di bida, etc., tambe a pone p’e.
E contracto cu Richard Arens a cera a titulo personal cu RdA como director a cuminsa dia prome di november, 2016. Prome cu esey tin den administracion 14 recibo riba nomber di Horizon pa trabou di consultancy haci pa RdA, cual consultancy ta di Richard Arends. E suma cu el a cobra pa e dos lunanan di trabou aki tabata en total 268.591,50 florin. Por mira tambe cu den administracion cu tabatin un dia, esta 15 di october, riba cual a entrega 4 `factura di respectivamente: 36.483, 75; 13.196,25; 8538,75 y 8538,75 florin. Pa un total di 66.757,50 florin.
Den e periodo cu Arends a asumi e puesto di director di RdA, su compania Horizon cu a haya un directora nobo, a sigui haci trabou pa RdA y a entrega seis factura entre november, 2016 y februari, 2017 pa sumanan di: 31.200; 83.110,50; 15525; 15.525; 15.525; y 15.525 florin. Pues den e cuatro lunanan, for di november pa februari, 2017 cu Arends a cobra e suma di mas cu 80 mil florin na salario, “su compania” Horizon a strica otro 176 mil florin. Pues el a haya un entrada total di mas cu 264 mil florin for di RdA den 4 luna di tempo, via di su trabou como director y e compania di consultancy Horizon.
E suma total cu Horizon a cobra for di september pa februari, 2017 tabata 445.002 florin.
Con por yama of cataloga e situacion aki den cual ta envolvi un persona cu despues a subi lista politico di AVP y a bira representante di pueblo den Parlamento. Esaki ta situacionnan cu Pais Aruba mester a carga y pasa den situacionnan dificil pa probecho propio. Sinembargo no ta esaki solamente ta e situaion doloroso cu Pais Aruba mester carga, tambe den e Rapport Forensico lo tin e famoso proyecto spirito di algen cu Aruba a paga hopi placa pe pero no a existi nunga…….. ra ra ra unda tur e sumanan aki a bay …… na momento cu e Rapport Forensico keda presenta parlamento tin hopi trabao pa haci.