Parlamentario Curtley Obispo durante motivashon di voto pa loke ta trata e Lei di Emegensia den e reunion virtual di Parlamento di Kòrsou a indiká ku: “Parlamento di Kòrsou na aña 2011 a fiha, fiho fiho, un logo di Parlamento di Kòrsou na Latin ku ta bisa kla i raspa na Papiamentu: Kaminda tin Lei, tin libertat!. P’esei Pueblo di Kòrsou komo parlamentario di Pais Kòrsou a base di e fundeshi sólido di e logo di Parlamento di Kòrsou aki, mi ta bisa awe djaweps 3 desèmber 2020: Kaminda tin Areglo di Estado di nos Pais Kòrsou, Leinan di nos Pais Kòrsou i Statüt di Reino Hulandes, tin libertat!
P’esei Pueblo di Kòrsou, komo Parlamentario di Pais Kòrsou, den mi di 2 mishon parlamentario lo mi vota PRO e Lei di Emergensia pa protehé henter nos Pueblo di Kòrsou i Pais Kòrsou, a base di entre otro: (1) e mishon noble di salba i protehé bidanan durante guera, desaster natural, terorismo, un atake militar òf un pandemia manera COVID-19; (2) mi konsenshi i tambe mi 2 huramentashon a base di artíkulo 49 di Areglo di Estado di Kòrsou. Kual ta indiká kla i raspa ku komo parlamentario di Pais Kòrsou bo mester yuda mantené Areglo di Estado di Kòrsou (nos lei máksimo) inkluyendo e artíkulo 96: e malchi di Estado di Emergensia, kual ta stipulá un Lei di Emergensia for di 10 òktober 2010; (3)henter mi investigashon di kontròl parlamentario tékniko legislativo di mas ku 260 página di e henter e Dossier Proyekto di Lei di Emergensia; (4) henter mi investigashon di Areglo di Estado di Kòrsou di Kòrsou, nos lei máksimo (P.B. 2010 no.86), kual ta bálido for di 10 òktober 2010; (5) e konsehonan di Raad van Advies; (6) Artíkulonan 60a, 42, 43 i 44 di Statüt di Reino Hulandes; (7) konklushon nan pa loke ta trata Areglo di Estado di Kòrsou, a base di e Konferensha di Mesa Rondó Reino Hulandes ku a tuma lugá riba 9 sèptèmber 2010 den e Ridderzaal, na Den Haag Hulanda”.
