Sanne Muiser a bin nos isla riba invitashon di Farm to Crafts. Djamars anochi, dia 21 di novèmber for di 7:30, e ta duna un presentashon na Katedral di Sumpiña. Entrada ta grátis, pero registrasbon via Facebook ta rekerí. Sanne ta un ‘Product designer’i ademas a sigui un estudio pa bira wardadó di karné. Su tayer, Studio Pluis, ta spesialisá den trahamentu di felpa ku angua, usando fibranan natural. E ta presentá su telanan ta rònt mundu.
Durante su presentashon e lo hiba nos den su investigashon di diseño i konta nos di e interakshon entre e paisahe, karnénan i e lana. Tambe e lo mustra nos imágennan di su proyekto ‘Retracing the Coffee Bag’, den kua ta resiklá fibranan natural for di sakunan di kòfi kolombiano.
Tokante Farm to Crafts
Farm to Crafts ta un investigashon kreativo na e posibilidatnan pa re-aktivá agrikultura na eskala chikí di spesífikamente materialnan prima di Kòrsou, pa desaroyá material i fishi.
Punto di salida di e proyekto ta ‘learning by doing’ i na e manera ei yega na un ambiente dinámiko pa investigashon i produkshon. Ku e diferente aktividatnan di e proyekto, ta trata di fasilitá interkambio entre agrikultor, artesano, diseñadó, eksperto i tur esnan interesá, ku un base di partisipashon i resiprosidat. Ku e proyekto, Farm to Craft ke: (1) Aktivá sektor di agrikultura i empresarionan kreativo pa traha huntu i asina mobilisá e energia i poder di e komunidat lokal den eksperimentonan konkreto. (2) Krea espasio pa diálogo, komprenshon i konekshon, usando agrikultura i e proseso di produkshon. I (3) Mustra públiko en general ku nos medio ambiente ta keda un fuente balioso di materialnan prima, ku ta trese perspektiva pa un futuro kreativo, duradero i ménos dependiente pa Kòrsou.
Por registrá pa e presentashon via e Facebook event di Farm to Crafts òf via e-mail
Pa mas informashon www.farmtocrafts.com òf Instagram: @farmtocrafts
