Riba djabièrnè 12 di ougùstùs último representantenan di kantornan di Trust na Kòrsou a haña splikashon amplio relashoná ku modernisashon di legislashon di wega di plaka na Kòrsou, durante di un reunion ku ministerio di Finansa.
Debí na nan responsabilidat di maneho di e e asina yamá “brievenbusbedrijven” e kantornan di Trust, tin un ròl importante i ta konosí komo esnan ku ta traha hopi plaka den e sektor aki.
E kontribushon i ekspertisio balioso di e kantornan di Trust ta sumamente esensial pa por prosedé ku e legislashon na un forma responsabel.
Minister Silvania a habri e enkuentro ofisialmente ku palabranan di bon biní kòrtiku i konsiso. “Nos no por keda bira mas, nos reputashon mester kambia drástikamente”, tabata palabranan di minister Silvania.
E industria di wega di plaka ‘online’ na Kòrsou ta konosí den eksterior komo un industria dudoso kaminda mafia internashonal ta laba plaka prosedente di e mundu kriminal.
Aparte di esaki e legislashon ku ya ta antikuá ta pone ku no tin sufisiente supervishon riba e lisensianan supsidiario ku ta keda otorgá. Pa e motibu aki anualmente gobièrnu ta pèrdè miónes di entrada na entreada/impuesto.
Ku e legislashon nobo minister Silvania ke krea mas kupo di trabou pa e komunidat lokal. Pa medio di eksigensianan supstansiá stipulá na entidatnan den e sektor di wega di plaka, ku ta kai bou di aplikashon di e ordenansa nashonal riba wega di plaka (de Landsverordening op de Kansspelen (LOK)) por krea mas kupo di trabou.
Parti di e aktividatnan akí mester keda hasí for di Kòrsou mes, i esaki mas tantu posibel ehersé pa hendenan lokal.
E entidatnan mester ta ubiká físikamente na Kòrsou i mester tuma mínimo 3 hende lokal den funshonnan klave, pa por krea un efekto di ‘spin-off’ pa nos ekonomia.
Esaki lo sòru no solamente pa entrada mas haltu den e esfera di impuesto riba entrada, pero tambe entrada mas haltu riba OB pa motibu ku e forsa di kompra ta oumentá na momentu ku embolbí dunadónan di servisio lokal.
Por konkluí ku tur seguridat ku e reunion aki a hiba na un diálogo positivo entre ministerio di Finansa i kantornan di Trust na Kòrsou.
Komo pais nos ta yega keda bes mas serka di un sektor di wega di plaka moderno.
