Nos tin un gobierno cu ta sin palabra y no ta cumpli cu acuerdonan. Un gobierno cu ta gusta manipula y semper ta hunga victima. E manera di proceder di e gobierno aki ta demostra un mentalidad anti-democratico. Nos tin un minister president cu ta papia puro mentira y na final a coba un buraco cu e mes a cay den dje. COHO a cambia pa Onderlinge Regeling cu de hecho ta nada mas cu e RAFT. Mientras tanto tur e landpakket cu ta den COHO si ta den full swing. Hulanda nunca a pone presion riba isla di Aruba sino como un bon piscador a laga pais Aruba horca su mesun curpa. E mega debe a cuminsa na partido mep y awe e mesun gobierno bao signatura di partido mep a crea un GIGA DEBE. Si nos mira cuanto placa a wordo fia riba mercado internacional anto nunca nos por bati man pa un gobierno cu ta hasi uso di un intermediario pa subi mercado internacional. E intermediario aki a contribui pa sink Aruba financieramente. Partido mep a cuminsa cu n’e, partido avp a sigui y awor partido mep ta sigui cu mesun mal ehempel. E resultado di e mal gobernacionan ta cu pueblo ta paga tur debe. Si gobierno firma e RAFT of keda sin firma e RAFT lo no hasi ningun differencia. Tan ten cu e gobierno aki ta na poder lo no tin cambio di maneho y lo no usa ningun placa pa projectonan nan nobo. Despues cu economia mundial cai nos lo mira e horizonte nobo.
Historia a demostra cu partido mep ta un partido di medida y esaki ta demostra nan ideologia socialista/comunista. Pais Aruba a drenta un Status Aparte cu debe pa mal maneho di partido mep paso bao di nan mando situacion financiero di Aruba a bay atras. Ora cu nos refineria Lago a cera su porta ela laga 340 miyon florin y te dia di awe ningun no a duna cuenta unda e placa a bay. E ta un tristesa di mira con hende grandi ora di campaña ta bisa un cos y despues ta dal pueblo un puñal den lomba. Nos pueblo trahador mester a entrega beneficionan. Nos por corda cu a kita 7.3/4 di salario y e solidariteitsbelasting di 8.2%. Un gobierno serio no ta sigui goberna a base di mentira y no por goberna riba un fundeshi di corrupcion paso esey ta hasi cu bo partido na mando no tin integridad y bo no ta mihor cu esun cu a baha.
Gobierno ta papia riba e presupuesto di 2024 cu lo tin un surplus. Gobierno ta drei aña tras di aña riba un refinaciamento di debe di 105 miyon. E aña aki so gobierno a fia 474.25 miyon florin. E ora ey ken nos kier gaña cu pais Aruba tin un surplus den nos presupuesto 2024. Laga nos reflexiona y pensa si e gobernantenan aki ta stima nos Aruba dushi terra of nos gobernantenan aki a converti nan mes den un traidor di pais Aruba pa nan propio beneficio. Nos mester tuma Hulanda tambe na malo paso Hulanda tampoco no a sali na interes di e pueblo di Aruba. Hopi cos ta pasa tras di cortina pero Dios lo saca tur cos na claridad.
Pais Aruba a yega un cruzada cu no por vota pa emocion mas ni pa ta simpatisante di un partido politico. Nos ta den e tempo pa tin gobernantenan di palabra y cu ta cana den integridad. No di hendenan cu ta yama nan mes cristian pero cu ta bay contra principionan di Dios. For di 1986 bin ariba pais Aruba a wordo goberna pa hendenan sin integridad y locual cu nan a hasi ta zink pais Aruba den debe. Esaki ta e tempo pa nos gobernantenan cu a masacra nos pais Aruba recohe e fruta amargo cu nan mes a sembra. Dios su tempo ta perfecto. Esaki ta hasi cu partido Curpa ta keda e unico alternativa.
Comunicado: Lider di partido Curpa Eric Ras
