Pa hopi aña kaba nos ta bibando ku un sistema sosial defisiente ku no ta sirbi e nesesidat di e ser humano den nos pais. Kòrsou tin 3 kas di bario ku t’ei pa duna servisio i sosten na e siudadano den ku pa un òf otro motibu ta pasando den un situashon di nesesidat.
Remarkabel ta ku tòg e kasnan di bario aki i e ministerio di SOAW no por kumpli ku e nesesidatnan di e mas ku 8500 siudadano ku ta kobra ònderstant i e siudadanonan aki no ta haña perspektiva i guia real pa por reíntegra bèk den e sektor laboral. Nos ta konsiente i ta aploudí e trabou balioso ku empleadonan di SOAW ta ehersé i nos sa ku si ta pa nan hopi di e problemanan lo ta solushoná. Pero e maneho di e Minister enkargá ku SOAW ta pone ku e empleadonan nan man ta mara.
Kòrsou konosé 12 sentro di bario ku apesar di hopi inisiativa i bon intenshon di vários fundashon, e sentronan di barionan aki no ta funshoná komo sentronan bon ekipá i ku por brinda servisio na e abitantenan den e area kaminda e sentro di barionan ta ubika. Suskrito ta di opinion ku pa bo yuda e abitantenan ku servisio i guia esaki mester sosodé di un forma ku e ta aksesibel, duradero i strukturá. No tin un sitio mas mihó ku un sentro di bario pa yuda duna guia i sosten na esnan den nesesidat.
Nesesidat di un siudadano no ta kos di hunga kuné, hibando kampaña ku lo subi su ònderstant, sin un estudio ku ta indiká kiko ta e nesesidat di esun ku ta kobra e ònderstant i tambe un análisis di e kosto di e subida aki i kon esaki lo ser finansiá. Meta di un gobièrnu ta pa forma siudadanonan ku por para riba nan propio pia pa asina kontribuí na adelanto di pais i no pa oumentá e dependensia di e siudadano ku ta gobièrnu mester karga ku su gastunan.
MFK i sigur suskrito ta dispuesto pa evaluá e sistema aktual i hasi e kambionan nesesario pa asina krea perspektiva bek pa e kobradónan di ònderstant i tambe struktura sentronan di bario pa sirbi nan meta muchu mas mihó i asina krea perspektiva pa un futuro briante pa esnan den e klase sosial mas abou den nos komunidat.
Awor mas ku nunka nos mester di hendenan humilde di kurason i kla pa traha pa e pueblo aki i komo yu di defuntu Amador Nita, mi kurason ta bati pa aspektonan sosial di mi komunidat pa asina krea desaroyo di nos hendenan. Pa hopi dékada nos ta pará na mes un kaminda, nos pais tin hopi kapasidat.
Uni bo mes na kambio duradero real, uni bo mes na MFK pa asina bo ta mihó sirbi!
