Lider di fraccion Accion 21 Miguel Mansur tambe tabata den e reunion hunto cu e grupo di taxistanan cu e comision di transporte publico. Segun parlamentario Miguel Mansur e structura mes no ta cana bon , por a compronde cu e taxistanan a sinta ya caba cu e dos fraccionnan unda cu ambos fraccion a duna e taxistanan e sosten completo y hustamente pesey mes ta straño cu ta pidi un reunion di comision enbes di un reunion publico pa pasa un mocion y asina pidi minister para e dos MB nan.
E reunion di comision ta un reunion secreto, e no ta publico no tin mocion y no tin amienda. Parlamentario Miguel Mansur ta di opinion cu si realmente fraccion di MEP y di AVP ta bisa cu nan ta banda di e taxistanan loke cu nan mester a haci ta pidi un reunion publico y den e reunion publico introduci un mocion cu ta pidi minister Arends trek in su MB, pero lamentablemente e paso aki no a sosode.
Te na e momentonan aki no ta compronde pa kico. Sinembargo na salida por compronde cu e problema ainda no ta resolvi debi cu e ta un problema basta grandi y basta complica. Sinembargo lider di fraccion di Accion 21 ta kere cu e dos fraccion nan di mas grandi den parlamento tin e herment den nan man pa bay parlamento pa resolve e problema. Bin parlamento y pidi minister pa trek in e MB , AVP y MEP ta vota pro y e mocion lo pasa y eynan minister Arends ta haye obliga di trek e MB aden.
Loke cu mester ta hopi cla cu un landsverordening semper ta riba un MB, dus minister Arends no por bin cu un MB cu ta lo contrario di landsverordening, esey simplemente no por y e ta contra di ley. Loke un MB por haci ta vul in loke cu e landsverordening ta bisa of e mester bin cambia e ley na parlamento y pa e ley cambia un mayoria den staten mester vota voor.
E problemanan cu minister Arends a trece padilanti Lider di fraccion di Accion 21 Miguel Mansur ta kere cu nan ta realistico, dus cu ta berdad , pero na mes momento cu na porta di eleccion, 10 luna prome cu eleccion ta dicidi di atende cu e parti aki debi cu tin 3 aña sinta.
Parlamentario Miguel Mansur ta compronde e punto di bista di e taxistanan y nan tin tur e derecho di manifesta y ta kere cu e sindicatonan por siña di nan. Na mes momento ta kere cu reforma den transporte ta necesario, esaki no ta conta solamente pa e taxistanan pero ta kere den mercado liber. Den su totalidad no ta malo cu ta hiba e discusion nan aki segun parlamentario Miguel Mansur. Ta importante cu e decisionnan ta bin atrabes di dialogo y no hisa pone un dia pa otro y si acaso esey mester sosode mes mester tin un periodo di transicion pa e taxistanan tin tempo pa ahusta y planea pe finansieramente.
Banda di tur cos lider di fraccion Accion 21 Miguel Mansur ta na fabor di e cambionan debi cu no ta kere cu e sistema di transporte actual ta esun di mas miho pa nos pais y nos turismo.
Parlamentario Miguel Mansur si e tabata minister di transporte publico lo e converti e taxistanan den empresario y lo coy cada persona cu tin un permiso di taxi sinta na mesa cu nan y negosha cu nan y splica kico ta e intencion y kier bay den un direccion di un sistema mas moderno unda cu lo por comberti 1 permiso den 5 permiso di Uber porehempel.
Na mes momento cu tin e problema aki pa loke ta trata transporte publico Arubus no ta ganando placa pero si laga Arubus para na aeropuerto por laga nan tur competi cu otro y esunnan cu ta ofrece miho servicio y miho prijs lo sobrevivi y asina Aruba como Pais e beneficionan ta miho. Laga tur hende competi y esunnan cu por duna e miho servicio y miho prijs nan lo sali gana. Asina e ta den comercio unda cu e prosperidad den un Pais lo sali y florece na momento cu tin comercio liber pero esaki no ta e caso na e momentonan aki.
Sinembargo Parlamentario Miguel Mansur a sostene e mocion cu a pasa december den parlamento, esaki ta e mocion cu minister Ursell Arends ta basa full su maneho abase di e sentimentonan cu e la pidi na december aña pasa y esaki basicamente ta e “licencia pa mata” e taxistanan cu parlamento lo a duna e minister . Sinembargo si mester lesa e mocion esaki no ta hustifica tur e pasonan cu e la tuma. Sinembargo no por kita afo cu minister Ursell Arends tambe tin un punto y nos mester keda realistico y trata di yega na otro.
