WILLEMSTAD, CURAÇAO
E polítiko hóben mas votá den historia elektoral di Kòrsou, Gwendell Mercelina Jr., a kumpli su kuarto aniversario for di su entrada polítiko na 2016. Alabes tabata tin tres aña komo polítiko independiente den e senario nashonal.
Despues di diferente oferta polítiko, Mercelina a krea un enkuesta popular pa risibí data i indikashon di su grupo di enfoke.
Den un forma inovativo riba promé di yüli último, dia di emansipashon, 157 aña di abolishon di sklabitut, ku un ambiente ameno na Prime Cuisine & Club na Zuikertuin Mall e la presentá su resultado pa famia, simpatisadónan i algun prensa.
Na momentu ku e la tèrminá ku e resultado popular di su kuestionario, Gwendell a afirmá su posishon nobo den e arena pa uni ku e partido di e arkitekto di nos emansipashon polítiko Dr. Moises Frumencio Da Costa Gomez, Partido Nashonal di Pueblo (PNP). Den palabranan di Doktor e la bisa “pa mi pueblo emansipá, nan mester studia”. Su vishon sostenibel a duna e partido un sobrebibensia úniko den nos arena polítiko durante 70 aña. Anto komo polítiko kara nobo ku bos di su generashon Gwendell Mercelina, Jr ta afirmá ku nos por kambia e plan pero nunka e meta ku ta fiha riba bienestar di Kòrsou.
E la risibí un wèlkòm di kita sombré serka lider di partido Nashonal di Pueblo, sra. Ruthmilda Larmonie – Cecilia, i tambe titularnan prominente manera sra. Maria Liberia – Peters i sr. Faroe Metry.
Ku e kara nobo hóben di partido Nashonal di Pueblo su revitalisashon bo tin sigur ku PNP ta na kaminda!
P’esei Gwendell Mercelina, Jr. su desishon tabata importante pa kompartí. Por último e la bisa ku: “Nos no por sigui konstruí un gran nashon riba un base debil. Pa nos isla por prosperá, pa e ta outosufisiente i inovadó, mester traha riba un base sólido ku liderazgo i disponibilidat pa hasi kos. Bo por analisá esaki den diferente ángulo for di formashon di un kultura positivo, pa nos medionan finansiero te na nos edukashon. I awor te momentu ku tin lus bèrdè pa kambio real!”.
Por wak bèk presentashon di Revelashon Skèrpi riba https://bit.ly/
