Nos grandinan semper a bisa esey, y cada dia nos por contempla cu e no ta posibel, ni maske con
moderno y materialista cu e mundo por bira.
Pasobra tin dos caminda , un caminda hancho y un caminda smal, y ta hende mes ta scohe den cual
nan kier cana, E caminda hancho ta hiba na perdicion y e caminda smal ta hiba na pas y bida eterna.
E caminda hancho ta mustra bon na principio, yen di fiesta , amistad, paranda, pero tambe e ta yena cu
inmoralidad, maldad y malicia.
E caminda smal hopi hende ta rechase, pasobra den dje tin puresa, santidad, humildad, norma y balor,
y mas cu tur cos temor di Dios, y su final lo ta victoria den Cristo Hesus, den e reino di Dios.
Bijbel ta bisa nos cu lo tin dos grupo, un grupo cu Señor lo bisa : Pasa na mi man dechi siervo fiel,
pero tambe lo tin un grupo cu Señor lo bisa; Bay for di Mi, Ami no conocebo.
No ta tur hende cu ta bisa Mi Señor, Señor lo drenta e reino di cielo, ma esun cu haci e boluntad di Mi
Tata cu ta den cielo.( Mateo 7:21).
Pesey ta hopi bon pa nos tene cuenta cu e boluntad di Dios den tur cos, pa evita sorpresa y decepcion ,
ora nos tin cu presenta un ora pa otro dilanti Señor , pasobra ningun hende sa e dia cu Señor lo yama
nan, ni tampoco e dia di e Binida di Señor.
Pesey Romanonan 12:2 ta bisa lo siguiente: Y no sea conforme e mundo aki,ma sea transforma pa
medio di e renobamento di boso mente , pa boso por comproba kico ta e bon y agradabel y perfecto
boluntad di Dios.
Filipensenan 4: 8 ta para scirbi: Finalmente rumannan, tur loke ta berdadero, tur loke ta honorabel,tur
loke ta husto .tur loke ta puro,tur loke ta bunita,tur loke ta di bon fama,si tin algun birtud, y si tin algo
digno di alabansa,laga esakinan ocupa boso mente.
Ningun hende no por sirbi dos shon, Pasobra palabra di Dios ta bisa cu amistad cu mundo ta enemistad
cu Dios,
Esun cu ta kere cu e por sirbi Dios y mundo na mes unmomento ta gaña su mes y su propio orguyo y
arogancia lo trece tristesa den su curason.
Den e palabra di Dios , ta para scirbi: No gaña boso mes Dios, Dios no ta laga haci bofon di di dj’E. (
Galationan 6:7) Pasobra loke hende sembra e lo cosecha.
Tur hende mester didici di biba un bida completo pa Cristo Hesus, pasobra un mitar bida Cristian no ta
existi den bista di Dios, un bida Cristian fake, yena cu kier, arogancia, cu hopi falta di humildad y
temor di Dios ta tempo perdi.
Senor lo recorda tur hende den su palabra : Esun cu no ta cu Mi ta contra Mi, den Señor no ta existi
dos caminda,sea bo ta Dios of bo ta sin Dios, pero un bida neutral of un bida cu bo ta baila tur dos
banda ta un bida cu bo mes a scohe pa biba. Y tur cos cu nos ta haci riba nos mes no tin respaldo di
Dios.
Dios ta lus y den dj’E no tin nada, nada di scuridad. Si nos cana den lus mescos cu E mes ta den lus,
nos tin comunion cu otro, y e sanger di Hesus, Su Yiu ta limpia nos di tur pica.(1 Juan 1;6-7).
Sinceramente, Pastor Marcel Balootje.
