E rapport di Forensic Services Caribbean riba RdA uno ta profundo cu hopi dato a bini dilanti. Pero e pregunta ta si esaki no ta placa di mas gasta. E rapport despues di tur su descubrimentonan ta bisa na final: “Tenslotte willen wij hierbij nogmaals benadrukken dat dit rapport alleen is bedoeld voor u, als opdrachtgever en haar aandeelhouder.” Y con awo? Ta e pregunta. Un persona mester para responsabel pa tur loke a bay malo den Refineria di Aruba. E no por ta simplemente un rapport, mirando e placa cu esaki a costa pa trah’e.
RdA a cuminsa na 2016 y e suma cu el a saca te cu september, 2020 na uzo di consultant & legal fees, pa IT, Marketing & PR, Security, decoracion, donacion, organisaciondi evento, renobacion di dos bungalow (un pa oficina y otro pa e director biba), compra di mobilario y materialnan oficina, huurmento di aparatonan, etc., a costa miyones. Y na final Refineria di Aruba no tin propiedad.
Ta papia aki di un suma di 23 miyon florin haci na gasto, sin conta aki e payroll di RdA mes, pasobra mayoria di e trahadonan cu tabata wordo gehuur.
Segun e statuutnan, e director (den e caso aki) Alvin Koolman, tabata responsabel di operacion diario di RdA, tabata firma tur chek, ordo di trabou of ordo di pago.
Den e rapport ta surgi e sospecho cu e propio director di RdA tabata indirectamente envolvi den e compania cu a haya e suma di pago mas grandi for di RdA, cu tabata riba 2 miyon florin. Banda di esaki, el a contracta su propio famia pa haci trabou cu nan empresa no ta specialisa den dje, a beneficia su propio yiu cu un salario di 3500 florin pa luna como stagiaire, mientras cu otro hobennan tabata haya un compensacion menor; el a paga su mes placa di mas pa vakantie no tuma y uzo di credit card pa cosnan priva cu ta core riba 80 mil florin.
Despues di tur esaki e director a bandona Aruba y intento pa haya contesta riba algun pregunta cu e investigadonan tabatin no a duna resultado.
Ta facil pa menciona cifra y nomber di persona of companianan (cada un lo mester wordo investiga individualmente) pero na final di cuenta esun cu a firma e oro di pago ta keda esun responsabel pa e actonan di mal uzo di recursonan di RdA. E unico bentaha cu pueblo, of instancianan, por a beneficia di dje tabata e un poco mas di 500 florin cu a haci na donacion (sponsership). Pero esaki tambe mester investiga si no ta pa e mesun hendenan cerca na tur e companianan cu a saca probecho di RdA.
A haci pago sin contracto of sin specificacion di e trabou en cuestion, a otorga trabou sin busca mas oferta; a otorga trabou cu a surpasa 100 mil florin sin cu a bay un destaho publico; a laga un negoshi di floresteria ofrece servicio di security, y asina tin hopi cos mas a sosode.
Con por ta posibel cu a haci uzo di 13 compania of persona individual riba tereno di “Consultancy & Legal Consultant”. A haci uzo di companianan di Marketing & PR na momento cu internamente tabatin un persona cu ta ocupa e puesto como manager di e departamento aki. A renoba un Bungalow (no. 71) cu a costa mescos cu construccion di un cas nobo, esta casi 361 mil florin. Personanan of instancianan tin contractonan lucrativo, pero asina mes ta huur auto pa nan, paga nan ticket di avion, y otro gastonan.
Ta imposibel cu por laga e situacion aki paga sin mes. Mester laga nos autoridadnan local haci investigacion, si tabatin cosnan ilegal a wordo haci, of tabata iregular. Forensic Services Caribbean a bisa na final den su rapport: “De heer Koolman is door de Algemene Vergadering van Aandeelhouders benoemd tot bestuurder van RDA. Als statutair directeur, is hij verantwoordelijk voor het gevoerde beleid (besturen) van de onderneming, hetgeen ander meer inhoudt dat hij verantwoordelijk is voor de realisatie van de doelstellingen van de vennootschap. De aansprakelijkheid hangt samen met deze verantwoordelijkheid.” Pues e pregunta ta: Kico awo?