Un gobierno sin vision tin como unico solucion sigui masacra nos pueblo cu medida

Den 6 aña di gobernacion bao di signatura di partido mep a destrui nos isla. Partido mep a drenta gobierno despues di a hiba un campaña acusando partido avp di a ocaciona un mega debe. Pueblo no mester lubida e destruccion cu a tuma lugar na november 2000 ora partido mep a lanta pueblo paso pais Aruba ta bancarota.

A pega auto na candela y despues a kibra drenta parlamento. Esaki ta con un partido socialista/comunista ta sembra miedo pa asina yega na poder. Partidonan socialista/ comunista unico cos cu nan ta hasi ta destrui un pais paso nan kier mira pueblo biba den miseria y esaki nos por mire tur caminda unda e partidonan di signatura socialista/comunista ta goberna. E mega debe a cuminsa cu gobierno di partido mep den e periodo di gobernacion di 2001 pa 2009 caminda gobierno a subi mercado internacional y a fia 1.4 biyon florin. Riba dje e gobierno ey a duna luz na BBO. Partido avp a drenta gobierno y a sigui mesun mal ehempel di partido mep caminda e gobierno di partido avp a fia 1.8 biyon florin riba mercado internacional.

E gobierno di avp no a sali na defensa di e pueblo paso no a hasi nada riba e caso di Tofanelli. Un debe cu a acumula na 2.1 miyon florin. E gobernacion di partido mep for di  2017 a crea un debe di mas 2 biyon florin y asina hisa nos debe nacional riba 6.3 biyon florin. Pais Aruba ta hypoteca y si mayan no por paga anto lo mester cuminsa bende companianan estatal manera WEB, ELMAR, SETAR ect., esaki ta locual cu landspakket ta referi na dje. Pan di trahadornan ta na peliger. Partido raiz a vota pa scapa e minister di turismo di mep pa malgastamento di placa di pueblo di 2.1 miyon florin. Awor cu SABA a mester di placa pa un bon causa partido raiz ta busca guerra cu SABA enbez di sinta na mesa y yega na un arreglo. Si tin 2.1 miyon pa regala anto mester tin placa pa SABA y pa nos grandinan. 

Bubali plas (RWZI) ta keda den noticia paso nos gobierno ta sinta grawata y no ta hasi nada cu e planta di purificacion di Bubaliplas. Kier construi mas hotel sin tene cuenta cu e consecuencianan. Un rapport di 2021 a manda un mensahe bon cla pa gobierno. Un planta cu tin un capacidad di 4300 m3 tin cu procesa  8000 m3. Gobierno no ta pone placa pa renoba e planta di purificacion y no tin urgencia pa trese solucion. Tin placa pa biaha, pa fiesta y pa auto nobo pero pa e planta di purificacion no tin placa.  Amsterdan Manor a hiba gobierno corte for di november 2022 y  parce cu e minister ta profundamente drumi y no sa di nada. Mientras  e dianan a pasa y for di maart 2023  gobierno mester paga un dwangsom cada dia cu 10 mil florin pa dia te na un maximo 250 mil florin y ainda gobierno no ta hasi nada. Tabata tin 4 caso na mesun momento y ta yega na un suma di 1 miyon florin. Gobierno ta sigui regala placa di pueblo. E asunto di dwangsom ta un otro escandalo den e gobierno di integridad aki.  

Pa caba di pone e cherry riba e bolo gobierno kier bin cu un BBO di 7% na frontera. Cada bez e cifra di BBO na frontera ta cambia y awor 70 miyon. Nos tin un gobierno cu ta mal pagado y riba dje e ta un gobierno selectivo ora ta trata pagamento di debe. Segun informacion cu nos a ricibi ta paga su comerciantenan prome y ta laga e otronan warda. Riba dje ta bisanan cu gobierno no ta paganan mas paso e tempo a pasa. Asina e gobierno aki a destrui nos economia.  Gobierno Hulandes a bisa gobierno pa bay di acuerdo cu rijkswet of paga e 916 miyon florin na october 2023. E gobierno cu a masacra nos pueblo lo bula bay Hulanda pa entrega nos autonomia. E husticia di Dios no ta bay bin sino e t’ey caba. Ba sembra y awor ta e tempo pa bo cosecha locual cu bo a sembra. E gobierno di integridad aki ta campeon den gañamento. E mentirosonan lo no drenta e reino di Dios. Locual cu ta impossibel pa hende ta possibel pa Dios.  Partido Curpa ta e unico alternativa.