Un gobierno cu ta regala placa di pueblo

Dia 22 di februari 2023 ta bay ta un otro dia scur den historia di pais Aruba. Tristo pa constata con nos gobierno ta keda hasi mesun errornan y ta parce cu nan por hasi y deshasi. E logo di campaña cu e hende ta central a keda na solamente un palabra bunita. Kizas e logo cu nos famianan y amigonan ta central lo paz miho. 

Nos tin un gobierno cu ta gusta regala placa di pueblo y despues ta core bay Parlamento pa exonera ministernan di para responsabel pa e placa di pueblo cu nan ta regala. Nos por a mira un ex-minister en bez di sinta na cas y disfruta di su pensioen a scohe pa hinca su mes den mas problema cu e ta caba. Nos no sa si ta e ex-minister aki a pidi pa bira consehero of ela wordo acerca pa bira consehero, pero ela para bira un un superman cu diferente funcion. E ta enbolbi den 3 compania/ fundacion di gobierno. Nos ta supone cu su salario tambe ta uno super bon. Un salario hopi mas halto mes cu tempo cu e tabata minister.

Nos gobierno ta asina bon di curason cu ta regala placa di pueblo, pero pueblo mester biba den miseria. Nos pueblo mester keda keto paso asina lo wordo intimida. Un gobierno cu ta regala Citgo 175 miyon di dollar cu lo mester ta destina pa desmantela e refineria. Un refineria cu a cuminsa cay den otro y tristo cu por zona ta no tin placa pa desmantela e refineria paso a regala e placa.

Nos grandinan y esnan cu no tin trabao no ta importante pa gobierno paso nan mester mira con ta yega na eigenbijdrage pa locual ta nan medicamento. Gobierno no ta worry cu salud di nos pueblo paso sin remedi nan salud lo bay atras cu na final lo ta mas gasto pa AZV, pero esey no ta nada pa gobierno.

Si nos pueblo sigui e patronchi di gobierno Hulandes anto nos pueblo lo mira cu e gobierno di Aruba ta hasi mesun cos.  Ainda tin 2 miyon florin riba mesa cu partido mep kier salba e ex-minister superman di mep. Contra tur conseho a dicidi di cera e contract toch e compania Americano y awe ta sinta cu e batata cayente den su scochi. E reunion di dia 22 di februari 2023 a bolbe salba un otro minister di su responsabilidad pa mal usa placa di pueblo. Un ley no por bay cu forsa retroactivo. E gobierno aki no ta prome biaha ta scop e mesun baranca aki.  E rapport di Contraloria General ta mustra gobierno bon cla di su fayonan.

Nos por corda con Parlamento a vota pa scapa e ex-minister di Labor y Asuntonan Social den e caso di fase y loonsubsidie. E rapport di Contraloria General ta demostra cu e minister a hasi mal uso di poder como minister caminda mas cu 90 miyon di placa di pueblo a wordo parti sin un mecanismo di control. Nos ta kere cu mester pone e parlamentarionan aki tambe pareuw cu e minster responsabel pa malgastamento di placa di pueblo. Dia di 3 rey a pasa dianan caba.

Nos por a mira con a scapa e minister plenipotensario di su malversacion na Arubahuis, paso a dune oportunidad di paga back. Nos no ta kere cu lo bay tin un caso paso nos promer minister tambe ta responsabel pa e mal maneho aki. Pa colmo a permiti e persona aki participa na eleccion. Si e tabata forma parti di oposicion, lo e ta cera awe. Si nos parlamentarionan cu ta sostene ta para pa integridad anto e ora ey lo tabata tin un investigacion penal. 

Nos lo keda observa nos gobierno su movecion y mira si gobierno lo apela e veredicto den cassacion. E ley di matrimonio di mesun sexo lo por wordo poni riba agenda pa wordo trata den un reunion di Parlamento caminda cu lo no bay tin problema pa pasa e ley y nos ta mira cu e lo wordo aproba cu entre 14 pa 15 parlamentario cu lo vota na fabor. Si no bai cassacion anto e ora ey e ta un done deal. Dia 6 di maart 2023 pueblo sa kico ta e posicion di nos gobierno. Partido Curpa ta e unico partido cu ta para pa e famia y cu nos FE ta keda den Dios.