Mas cu 1500 persona, incluyendo turista, a bishita Museo Arqueologico Nacional Aruba (MANA) riba 18 di maart ultimo. E programa a cuminsa cu canto di Himno di Aruba cu coro di Kibrahacha acompaña pa su grupo di cuarta. E dia a sigui yen di ambiente.
Grandi y chikito a pasa un rato agradabel cu dushi pasaboca y sopi crioyo. E cuminda y snack vegano y glutenfree a bay manera pan cayente. Bishitantenan a goza di e mini documentarionan, cu ta den un forma compacto y impactante a conta di Dundun -, Nydia – y Boy Ecury. E mini documentarionan ta produci pa Rebecca Roos Productions y co-financia door di UNOCA.
Mucha y hoben a disfruta di e tayer di artista Ruth Geerman. Nan a experimenta cu un material diferente pa traha arte, y a relaha den e skina di mucha unda a kleur e templates di flora y fauna di Aruba, cortesia di artista local Omaira Silva. Tambe nan a experiencia e ‘sensory box’ y a busca nan stempel di Indjan.
E mini bazaar cultural a atrae hopi bishitante cu su photobooth colorido decora cu arte di palo di artista Ezekias Perez Martinez. Muchanan a busca nan facepainting den color di bandera di Aruba y un dushi popcorn cerca e muchanan di Pastoral Hubenil Dakota. Den e bazaar tabata ofrece diferente producto traha na Aruba, manera likeur, arte y artesania, cos dushi y buki di crucigrama Conoce Bo Isla.
Alavez a tuma luga dos encuesta. Uno ta tocante debolbe obhetonan arkeologico na Hulanda pa Aruba, co-financia door di Mondriaan Fonds. E otro ta un encuesta di Aruba Tourism Authority tocante sentimento di comunidad pa turismo na Aruba.
MANA ta gradecido na un y tur cu a yuda hasi e Dia aki uno asina existoso. En especial Medionan di Comunicacion di Aruba, Comicion Dianan Nacional, Ministerio di Finansa y Cultura, Club Kibrahacha, UNOCA, artistanan Omaira Silva, Ezekias Perez Martinez. Tambe ta habla danki na nos bishitantenan y hopi importante nos boluntarionan hoben y adulto cu un biaha mas cu hopi entusiasmo a ricibi y guia bishitantenan riba nos Dia di Himno y Bandera 2024
