Werksternan, docentenan di EPI, Piscadonan, tur a dicidi di bay mustra nan mal contento awe pa cu gobierno. Cada un tin nan motibo a haci tal accion.
Enseñansa bou di atake tabata un biaha mas e lema di SEPPA cu a lidera e accion na fabor di werksternan, trahadonan di limpiesa, kendenan despues di a haya tranklilidad na 2012 , awo ta sinti cu nan ta bolbe bay atras. E intencion di e minister encerra pa deshaci di e werksternan y laga un compania priva haci e trabou di limpiesa na e scolnan.
Miedo di e trahadonan di limpiesa ta cu no tin siguransa cu nan tur 90 ta bay haya trabou bek cu e compania di trabou. Nan situacion, e sindicato a splica, ta malo pasobra nan salario no ta gran cos. P’esey SEPPA ta insisti cu nan kier claridad di kico ta bay pasa. Esey ta e motibo cu nan a dicidi entrega un carta di protesta na gobierno.
Despues di a cana pa yega gobierno a topa cu minister di labor Glenbert Croes, kende tabata esun pa ricibi e carta y a priminti di lo bay averigua of hiba e asunto aki den Conseho di Minister.
Mas trempan docentenan di EPI cu tin un preocupacion a sali pa demostra nan malcontento den un reunion unda cu a invita prensa pa mira si nan por haya reaccion. Sindicato SIMAR tabata presente pa apoya e accion aki. E docentenan di Ciencia y Tecnologia a bisa cu nan a entrega un carta na januari encuanto overuren, cu esnan di aña pasa no a wordo paga ainda. Nan ta mas preocupa pasobra a informa directiva cu semester nobo ta cuminsa y lo bini cambio, entre otro nan tarea cu overuren. Pero pa esaki nan kier haya e overuren di añ pasa y garantia cu e overuren, si e sosode, lo wordo paga.
E accion di piscadonan tabata parce algo cu no tin sentido, unda e unico motibo di nan preocupacion ta un area di parkeo pa nan cliente. Mayoria di piscadonan no ta bende nan “catch of the day” cu pueblo. Mayoria ta bende cu restaurantnan, pa cual nan demanda no ta comprondibel.
E inversionista a bisa caba cu no tin nada a cambia desde cu nan a cumpra y tuma e proyecto di hotel na waf over.
