Un di e kayanan prinsipal di Boneiru, esta Kaya Amsterdam ta haña un bista nobo. E diseño pa Kaya Amsterdam nobo ta kla. Den e promé kuartal di 2021 tin un destaho pa e proyekto. Despues di e esei e trabounan por kuminsá.
Ta rekonstruí Kaya Amsterdam for di rotònde di Hato te na Kaya Caribe. Na parti sùit di Kaya Amsterdam ta bini un kaminda pa kore baiskel den ámbos direkshon. Tambe ta bini un parti di e kaminda pa outo por drenta unu pa unu huntu (invoegstrook) enfrente di Skol Básiko De Pelikaan pa mehorá siguridat di tráfiko. Ta hala e palunan di lus mas patras pa krea sufisiente espasio. E kompanianan di utilidat ta haña oportunidat pa hasi uso di e trabounan na e kaminda pa renobá òf adaptá nan kabelnan i tubunan. Punto di salida di e diseño ta ku e kaminda nobo tin un durabilidat di 30 aña.
Ta rekonstruí vários kaminda na Boneiru komo parti di e ‘Plan di Maneho Kareteranan – Beheerplan Wegen’. Entidat Públiko Boneiru a kuminsá ku e ehekushon na aña 2017 i e proyekto ta kana te ku 2026. Gobièrnu di Reino ta finansiá e trabounan.
Tur hende ku tin pregunta tokante diseño di Kaya Amsterdam por hasi esaki via e-meil na directie_ro@bonairegov.com.
Nos ta deseá tur hende felis dianan di fiesta!
