Despues cu a detene Franki Abath, ex director di DIP, autoridad a haya cu no tin motibo pa mantene Ninosca Nuñez mas deteni. El a haya su libertad den oranan di mainta
Tabata mainta cu Recherchenan di Landsrecherche a bay busca Franklin Abath na su cas pa hibe oficina di Landsrecherche pa interogacion. Te den oranan di merdia ainda e tabata bou di interogacion.
E tabata e persona responsabel, ora cu e tabata director di DIP, pa otorga e terenonan commercial cu e sospechosonan tabata pidi.
E problema den e caso di Avestruz aki ta e manipulacion cu tabatin pa haya e tereno y kico ta haci cu e terenonan aki. Den e caso di e clan Arends – papiando di rumannan y sobrinonan – ta haya tereno via di un NV pero cu nan mes nunca tabata haci uzo di e tereno aki. Ta busca e terenonan via di un NV y despues, segun e sospecho, ta haci negoshi cu nan. Nunca a pone ni un bloki riba e terenonan.
Loke ta investiga ta e forma con ta haci e negoshi aki. Tin compania a pidi y haya tereno prome cu a lanta e NV mes. Supuestamente, un persona di paden ta tip-off e clan cu tin inversionista interesa den un tereno grandi, pa cual mesora ta core bay busca e tereno. Na mesun momento na informa e inversionista cu e tereno ta otorga caba, pero cu esun cu tin’e probablemente no bay haci uzo di dje y e lo po cumpra e NV cu ta bini cu e tereno.
Asina a logra yega na diferente tereno grandi no solamente den e area di hotel, pero tambe na zonanan comercial, Wayaca y inclusive un ruman Arends a yega di pidi un tereno di 42 mil meter cuadra na Sero Colorado, sin cu e tin ningun experiencia den e ramo aki.
Tin denuncia haci door di mas cu un persona / stichting for di 2017. Den tur esaki a pone tambe nomber di ex minister Benny Sevinger, kende tabata simplemente pone bou di e peticion “dezerzijds akkoord”.
Dos palabra cu por tin e exmandatario den problema serio.