Un Consulta Pop-Up pa Comunidad na Ayo

Comunidad en general ta invita pa bin comparti nan conocemento y curiosidad tocante e sito cultural y natural Ayo riba diasabra 20 di mei di 8’or pa 10’or di mainta.

E compania local Camia ta trahando riba un asina  yama plan interpretativo pa enriquece e experiencia di bishitantenan na e sitio monumental di Ayo, na mes momento cu ta conserva e sitio su balornan cultural y natural. E plan lo encera e.o. pone informacion na puntonan strategico den Ayo y asina hasi accesibel pa tur usuario, conocemento di e geologia, Prehistoria, historia, flora, fauna y balor contemporaneo di Ayo. Esaki ta un proyecto di e Aruba Amenities Committee crea pa Prome Minister di Aruba.

Riba e diasabra 20 di mei di 8’or pa 10’or di mainta na Ayo, varios specialista den ramo di e topiconan menciona lo comparti na un forma interactivo, nan conocemento cu esnan cu ta desea di conta nan mes storia y experiencia cu Ayo.  Asina lo tin speed tours tocante geologia y arqueologia. Publico lo tin oportunidad pa indica kico nan lo desea di haya sa durante un bishita na Ayo y por ehempel cua facilidadnan lo hasi nan experiencia uno mihor.

Camia ta un compania cu enfoke riba patrimonio y a ser estableci recientemente pa Arminda (Vivi) Franken – Ruiz, kende a lidera Museo Arqueologico Nacional Aruba te 2016 y ta activo awendia como profesional di patrimonio cultural di e parti Caribense di Reino e.o. como advisor di  Mondriaan Fonds na Hulanda y di e Asociacion di Museonan di Caribe.

Consulta di stakeholders ta un elemento esencial ora ta traha un ruta, trail, pad pa bishitantenan den un parke, museo, area di exposicion of sitionan similar. E proceso pa traha un plan interpretativo pa Ayo ta encera ademas di consulta cu stakeholders di varios sector, investigacion di e sitio, – di archivonan, – di bishitantenan y entrevistanan. E consulta di diasabra dia 20 na Ayo  ta dirigi riba haya informacion di comunidad en general, pa otro stakeholders por ehempel den area di turismo y educacion lo tin mas oportunidad pa duna nan contribucion.

Pa mas informacion tocante e mainta na Ayo por manda un e-mail na a.frankenruiz@gmail.com.