The clock is ticking y no na fabor di gobierno. Nos di partido Curpa ta kere cu juni ta uno crucial pa e existencia di gobierno aki. Gobierno a coba un poz y awor e mes lo wordo derra den dje. E problemanan lo pasa manera un tsunami cu lo bay riba gobierno y esaki ta e cosecha cu nan lo recohe. Gobierno ainda ta bira rond pa pone su firma bao di e RAFT y asina pone Aruba bao di curatela. Gobierno no tin 916 miyon pa paga gobierno Hulandes. Interesante pa sa si nos prome minister lo firma bij het kruisje manera ela hasi dia 13 di November 2020 y asina entrega nos autonomia completo.
Aruba a conoce e gobierno di mas malo den e ultimo 6 aña. Nan ta un fracaso total. Nos por a mira cu tabata tin un conferencia riba terreno di agricultura pero peticion pa tereno ta pega na DIP. Hendenan ta wardando terreno como 2 aña caba pa haya un huurgrond pa sembra of cuido di bestia. A yega ora pa stop di pronkia y pone man na obra.
Riba tur terreno gobierno a score malisimo. Pueblo di San Nicolaas ta mira cu gobierno no ta saca un man pa yuda John Wesley College. Aña escolar ta yegando su fin y ta tristo pa mira cu un scol cu a aporta asina hopi na e pueblo di San Nicolaas dal su porta cerra si nada no wordo hasi. Nos por mira cu ta den tempo di eleccion so e pueblo di San Nicolaas ta importante pa nan voto y awor cu nan mester di un man gobierno ta laga nan na caya. Pronto lo tin eleccion y pueblo di San Nicolaas mester pone tanto partido mep como partido raiz na carreda.
Minister di nos grandinan ta sinta ainda man cruz y no kier sinta na mesa pa caba cu e incertidumbre di SABA. Laga nos mira si di parti di e minister ta bai demostra tin boluntad. Segun nos por a compronde cu SABA tin su cuenta anual pero si no sinta na mesa no por yega na solucion. E minister mester a bay Parlamento caba pa pidi pa aloca e fondo cu SABA mester. Ora pa scapa un ex minister di turismo di partido mep si gobierno a core bay Parlamento pa scapa peyeho pa un suma di 2.1 miyon florin y tabata tin mester partido raiz pa ta e salbador. Segun nos por a compronde cu SABA no a haya ningun ayudo y lo no hay’e tampoco. Gobierno ta pone minister Arends su cara na berguensa.
Tin asuntonan hopi importante pa trata e bienestar di nos isla y nos tin un gobierno sin vision. Nos di partido Curpa lo desea di mira e asunto di nos grandinan keda resolve pa asina por reina un paz pa tur esnan envolvi. E asunto di BBO na frontera cu 7% tambe ta un otro medida. Hulanda su costo di bida a aumenta cu 15% e aña aki y ta un pais cu ta produci, Si na Hulanda ta papia di 15% anto aki na Aruba nos por asumi cu elo ta 30% paso tur cos importa. Nos por a mira cu 3 parlamentario di partido mep a bay reunion di IPKO y pa spaar placa a dicidi di keda hunto den un camber pero ora cu lo bay trata e ley di BBO na frontera nan ta cla pa grita pro paso mester di placa pa sigui biaha.
E reintroduccion di parkeermeter a resulta den un fracaso. Nos di partido Curpa no ta mira e departamento aki lo bay genera e placa cu nan a kere di ricibi. E tristo ta cu ela hasi e situacion den nos centro di ciudad mas pio di locual cu e tabata. Esaki ta refleha tambe cu situacion financiero di nos pueblo ta hopi malo. No por a tende cu 60% di nos clase trahador ta biba di un minimumloon. Gobierno mester habri su wowo y mira cu no tin espacio pa mas medida.
Un otro ley ta esun di matrimonio di mesun sexo. Nos por a mira cu grandes liga a cancela e celebracion di orguyo paso ela mira caba cu e orguyo ey lo hiba grandes liga den un perdida biyonario. Budlight y Target a hiba un perdida di mas di 25 biyon di dollar den un corto tempo. E pueblo Americano ta boycott tur cos cu ta hasi cu e celebracion aki. Si Aruba kier conserva e mercado di turista Americano mester pensa bon prome cu tuma un paso cu lo ta desastroso pa nos turismo. Nos ta kere cu locual a pasa 9 di februari 2023 cu e crucero, a laga un sabor amargo atras. Nos ta den e tormenta perfecto y prome cu luna aki termina nos lo haya sa con nos isla lo ta para financieramente y locual cu pasa na Europa y America lo tin consequencia pa nos tambe. Pueblo di Aruba laga nos mirada ta riba Dios paso ta Dios so tin solucion pa nos situacion. Laga esaki ta e señal pa nos pueblo uni cu partido Curpa. Tur otro partidonan a usa nos pueblo Cristian solamente pa e voto y nada otro. Partido Curpa ta keda e unico alternativa.
