E barku di marina Hulandes Zr.Ms. Groningen a interseptá, pa di 6 biaha den korto tempu, un transporte mas di droga. Den laman Karibe, e barku di patruya a logra detené un lancha rápido narko ku 8 tripulante abordo. E barku a interseptá 228 kilo di kokaína. E kaptura a tuma luga 26 di juni pero a keda anunsiá awe.
Durante di e anochi di 25 pa 26 di juni, e avión di partuya Dash -8 di Warda Kosta di Karibe a tuma nota di un lancha narko (go-fasts) den laman Karibe. Zr.Mr. Groningen tabata den e zona i a tuma akshon inmediato. E barku di marina a kuminsa un persekushon hasiendo uzo di nan helikòpter di Warda Kosta Merikano i dos lancha rápido di intersepshon FRISC. Abordo di e lanchanan interseptor tabata tin e Eskuadron di Infantería di Marina Real i Flota di Warda Kosta Merikano. Despues di un persekushon, apoya pa un avion di patruya DASH-8, e lancha narko a keda interseptá. E ocho supuesto kontrabandistanan i e 228 kilo di kokaína a keda entregá na Warda Kosta Merikano.
Barku di Stashon
Ku e intersepshon aki, Zr.Ms.Groningen, ta konta ku 6 intersepshon di droga realisá for di momentu di su presensia na komienso di april 2024 den Karibe. E barku ta keda usa, entre otro, pa operashonnan anti-droga. Esaki ta tuma luga den interkambio konhunto ku Warda Kosta Merikano i Warda Kosta Karibense.